Монгол Улс найм дахь удаагийн Ерөнхийлөгчийн сонгууль зохион байгуулах гэж байна. Эрх зүйн хүрээнд нэр дэвшигчид өнөөдөр Сонгуулийн ерөнхий хороонд материалаа хүргүүлэх учиртай. Тиймээс МАН-аас нэр дэвшигч У.Хүрэлсүх өнөөдөр 11:40 цагт буюу морин цагт материалаа хүргүүлсэн.  

Түүний материалыг МАН-ын Ерөнхий нарийн бичгийн дарга Д.Амарбаясгалан уламжлан өгөхдөө "Хууль ёсоор Мөрийн хөтөлбөрөө хянуулахаар Үндэсний аудитын газар хүлээлгэн өгөхөд 17 зүйл заалтад өөрчлөлт оруулахыг хүссэн. Үүний дагуу дээрх зүйл заалтад өөрчлөлт оруулаад дахин явуулахад шаардлагад нийцсэн байна гэдэг хариуг өгсөн учраас Сонгуулийн ерөнхий хороонд хүргүүлж байна. Төрийн тэргүүнийг сонгох сонгууль шударга болж, эргэлзээгүй байх ёстой. МАН-аас нэр дэвшигчийн хувьд эв нэгдлийг эрхэмлэсэн үндэстний ерөнхийлөгч байна гэдгээ тунхагласан” хэмээсэн юм.

Энэ үеэр Сонгуулийн ерөнхий хорооны дарга Л.Дэлгэрнаран "Үндэсний аудитын газраас нэр дэвшигчдийн мөрийн хөтөлбөрийг ирүүлэх ёстой. МАН-ын мөрийн хөтөлбөр зохих газраа шалгагдсан гэж үзэж байгаа учраас материалыг хүлээн авч байна. Гэхдээ нэр дэвшигчийн материалыг өгч авалцах биш, нягтлан шалгах хуулийн заалттай. Техникийн болон нууцын ажилтан гээд дөрвөн хүний бүрэлдэхүүнтэй ажлын хэсэг, хуульд заасан шаардлагын дагуу нягталж, тэмдэглэл үйлдээд, хоёр талаас гарын үсэг зурснаар нэр дэвшигчийн материалыг хүлээж авсанд тооцно" гэсэн юм.

З.Шатар 

Түмэн.мн