Ус цаг уур, орчны шинжилгээний хүрээлэнгийн урьдчилан мэдээлэх сектор Ш.Цогтоос цаг агаарын нөхцөл байдлын талаар тодрууллаа.

-Хүйтний эрч эрс чангарсан. Гэтэл “Цасгүй шинэ жил тэмдэглэх нь” гэж иргэд ярих боллоо. Ойрын өдрүүдэд орон нутагт цас орох уу, цаашид цаг агаар ямар байх вэ?

-Хүйтний эрч сүүлийн хэд хоног эрс чангарлаа. Өнөө шөнө гэхэд Увс, Завханы хойд хэсэг Хөвсгөл, Дархадын хотгорт 32-38 градус байна. Говийн нутагт 16-21 градус байна. Урьд жилийнхтэй харьцуулахад дулаахан өвөл болж байгаа. Энэ сарын 20-нд зүүн, 21-23-ны үед төв болон зүүн аймгуудаар цас орно. Маргааш, нөгөөдөр нутгийн зүүн хэсгээр салхитай байна. Цас бага багаар нэмж байгаа ч нийт нутгийн 30 хувьд цасан бүрхүүл тогтсон. Увс, Хөвсгөл, Сэлэнгэ, Булган аймагт цасны зузаан 10 см байна. Ер нь бол цастай газруудаар нэмж цас орно.

-Удахгүй ес эхлэхээр хүйтний хэр чангарах вэ. Энэ талаар тодруулаач?

-Арваннэгдүгээр сар эхэлсэн ч сүүлийн арван жилд болоогүйгээр дулаарч цасаа хайлууллаа. Тийм учраас энэ жил ес эхлэхэд хүйтний эрч суларна. Зарим хүн сайн байдаг гэж ярьдаг. Энэ сарын 23-наас 3-5 градусаар хүйтний эрч сулрах төлөвтэй. Харин ес эхлэхтэй зэрэгцээд тунадас орно. 25, 26-ний үеэр тунадас орж түүнээс хойш хүйтэрнэ. Гэхдээ шинэ жилээр ямар байхыг урьдчилан хэлэх боломжгүй.

С.Ичинхорлоо

Эх сурвалж: Tumen.mn