УИХ-ын гишүүн асан, "Үндэсний эвсэл"-ийн тэргүүн Нямтайширын Номтойбаярын өнөөдөр нийгмийн сүлжээнд "Бидний хөгжил хаана байна вэ? Бүгдээрээ баяжих бодлогоо боловсруулая, сэтгэлгээний болон санхүүгийн тогтолцоогоо өөрчилье. 20-р зуунаас 21-р зуунд шилжие. Жишээ нь ЗИС 130 vs ZETROS" гэсэн гарчигтайгаар бичлэг оруулсан нь олны анхаарлыг татав. Тодруулбал, тэрээр: "Саяхныг хүртэл надад ЗИС 131 байсан орос машин. "31 зургаан дугуйн дээрээ 3.5 тонн даацтай. ZETROS нэг дугуй дээрээ 5 тонн даацтай. Ажлын бүтээмжийн зөрүү 7 дахин их" гэх мэтээр өгүүлсэн юм. Монголын томоохон тэрбумтны хүүхэд сайхан машин унаж бололгүй л яахав. Харин түүнийгээ гайхуулах нь хэр зохимжтой юм болдоо.

Монгол Улсад баялгийн тэгш бус байдал байгаа тухай хүн бүхэн л ярьдаг. Жишээлбэл Нямтайширын Номтойбаярын хувийн компани өдөрт 10 тэрбумын борлуулалт хийдэг. Өөрөөр хэлбэл зөвхөн нэг өдөрт 2 тэрбумын ашиг олдог гэсэн үг. Энэ бүх баялгийг Нямтайширын гэр бүл лиценз гэх алга дарамхан цаасаар л өөрсдийн болгож авсан билээ. Тэгвэл баялгийн жинхэнэ эзэн болсон Монголын ард түмэнд ашгаасаа хуваалцаж болохгүй гэх газаргүй. Шулуухан хэлэхэд Номтойбаяр гайхуулаад буй машинаасаа сум бүрт нэгийг хандивлах бүрэн боломжтой. Нөгөөтэйгүүр, Номтойбаяр УИХ-д хоёр удаа сонгогдсон, сайдаар нэг удаа, дэд сайдаар нэг удаа ажилласан, тэр бүү хэл МАН-ын дэргэдэх залуучуудын байгууллагыг хүртэл удирдаж явсан нэгэн.

Өөрөөр хэлбэл, сум бүрт бенз машин биш, ЗИС 131 байгаа нь төрийн буруу юм бол Номтойбаяр ч үүнд хариуцлага хүлээх ёстой л нөхдийн нэг. Үнэхээр Номтойбаяр баялгийн тэгш хуваарилалтыг дэмждэг болсон юм бол үүнийгээ өөрөөсөө эхэлбэл яасан юм бэ. Шулуухан хэлэхэд өдөрт олж буй 2 тэрбумын орлогоосоо сум бүрт бенз ZETROS машин аваад өгчихвөл үнэхээр л баялгийн тэгш хуваарилалтын төлөө байгаа юм байна гэж итгэе.

Э.Сүрэн

Sonin.mn