Автозам ашигласны төлбөрийг завшиж байж болзошгүй албан тушаалтнуудыг огцруулах шаардлага хүргүүлж, Тээвэрчдийн гэргий нарын холбооноос мэдээлэл хийлээ.

Тэдний төлөөлөл "Манай холбоо нь тээвэрчид болон тэдний гэр бүлийн эрх ашгийг хамгаалахаар 2018 онд байгуулагдсан. Бид өнгөрсөн долоо хоногт Гашуун Сухайтын авто замын нөхцөл байдалтай танилцаад ирлээ. Гашуун Сухайтын авто замыг хувийн хэвшил барьсан ч улсад хүлээлгэж өгсөн ба улс нь үүгээрээ мөнгө олох хэрэгсэл болгочихсон. "Эрдэнэс Монгол" ХК эзэмшдэг ч өдгөө "Гашуун Сухайт авто зам" байгууллагад хариуцдаг. Гэтэл "Бидэнд зам засах мөнгө байхгүй, "Эрдэнэс Монгол" санхүүжилт өгөхгүй байна" гэх хариуг байнга хэлдэг. Бид удаа дараа шаардлага хүргүүлж Зам тээврийн дэд сайд Л.Халтар нөхцөл байдалтай танилцан шаардлага хүргүүлснээр 2019 онд засаж байсан. Өмнө нь жолооч нар биеэ засах ч газар байхгүй байхад нь модон жорлон, хогийн сав байршуулж тохижуулсан ч хүнд даацын автомашин ихээр явдаг зам тул байнгын арчилгаа байхгүй учраас дахин сүйдсэн. Буцаад эвдэрсэн замаа засах ёстой байтал засахгүй удлаа.

"Гашуун сухайт авто зам" байгууллага 2019 онд маш том мэдэгдэл хийсэн нь өвлийн замыг засах сүүлийн үеийн технологийг нэвтрүүллээ гэж байсан. Гэтэл удирдлага нь солигдоод энэ ажил бүр таг болсон. Монголын экспортын 80 хувийг бүрдүүлдэг нүүрсний тээврийн зам дээр 20 мянган тээвэрчин зорчдог. Бид зөвхөн мөнгө, эдийн засгийн сэргэлт яриад байгаа ч иргэдээ хаясан сэргэлт яриад байж болохгүй. Иргэдийнх нь ажиллах нөхцөл байдал ч мөн хамт сэргэдэг баймаар байна. 10 жилийн өмнөх байсан дүр зураг, эрсдэл яг хэвээрээ л байгаад байна. Ийм хариуцлагагүй байж болохгүй.

Тиймээс дараах шаардлагыг хүргүүлж байна.

• Зам тээврийн яам, тэр дундаа сайд Х.Бямбацогт энэ асуудалд анхаарлаа хандуулж, арга хэмжээ авна уу.
• Гашуун Сухайтын авто замд яаралтай засвар хийхгүй бол авто ослын эрсдэл өндөр хэвээр байгааг холбогдох албаныхан анхааралдаа авах
• Үр дүнгүй, санаачилгагүй ажиллаж буй удирдлагууд, "Гашуун сухайт авто зам" байгууллагад хариуцлага тооцох, удирдлагыг солих шаардлагатай байна.

Дээрх мэдээллийг хүргэсэн Тээвэрчдийн гэргий нарын холбооны ТУЗ-ийн дарга н.Туул өөрийн түүхээс цухас дурдлаа. Тээврийн жолооч байсан түүний хань 2019 онд ажлаа хийж яваад буюу Гашуун Сухайтын авто замд авто ослоор өөд болсон байна. Тиймээс энэхүү асуудалд анхаарал хандуулж, авто замыг засаж, эрсдэлгүй болтол байж болох бүхий л арга хэмжээг авна гэлээ.

Мөн Тус холбооны тэргүүн Ж.Туул "Гашуунсухайтын авто замыг хувийн хэвшил бариад улсад өгчихсөн. Улс нь аваад мөнгө олох хэрэгслээ болгочихсон. Гашуунсухайт авто зам компани зам засах мөнгө байхгүй гэсэн асуудлыг одоог хүртэл ярьдаг.

Зам засагдсан гэж ярьдаг ч бодит байдал дээрээ засагдаагүй байна. Нүүрсний экспортын 80 хувийг авч явдаг авто зам дээр 20,000 тээвэрчин байна. 10 жилийн өмнө байсан эрсдэл байсаар л байна" гэв.

Иймд тус холбооноос Зам, тээврийн сайд С.Бямбацогтод Гашуунсухайтын зам дээр зам арчлалтын байнгын багийг ажиллуулан, дүгнэлт гаргаж арга хэмжээ авахыг шаардаж байгаа юм байна.

Мөн Гашуунсухайтын авто замын засвар арчлалтыг тогтмолжуулж, чанаржуулах хэрэгтэй байна. Учир нь халтираад өнхөрчихсөн, хагархайгаа тойрч байгаад уначихсан дүр зургууд хэвээрээ байна. Энд нэг хүн биш бүтэн гэр бүл хохирч байдаг гэдгийг онцлон хэлэв.

"Хурд хэмжигч, камер, 00 ч байхгүй байна"

Үргэлжлүүлэн авто зам ашигласны төлбөрийг завшиж байж болзошгүй талаар тус холбооны гишүүн н.Жавзансүрэн "Тээвэрчдээс дунджаар 500 орчим мянган төгрөг авдаг. Өдөрт 1,000 машин тус замаар гарч өнгөрөхөд 500 сая төгрөг болж байна. Сарын хугацаанд хамгийн багадаа 12-15 тэрбум төгрөгийг тээвэрчдийн халааснаас авч байна. Тэр зам шил толь шиг зам байх ёстой биз дээ. Гэтэл хурд хэмжигч, камер, 00 ч байхгүй байна.

20,000 залуугийн цаана 100,000 орчим хүний аж амьдрал явж байна. Гэтэл тэр их мөнгийг хүүлж авчхаад ажлаа хийхгүй байгаа хэдэн дарга нар байна" гэв.