Монгол HD телевизийн “Авьяаслаг монголчууд” шоу нэвт­рүүлгийн шүүг­чээр ажиллаж буй “Харанга” хамтлагийн ахлагч Ц.Чулуунбаттай ярилцлаа.

-Та олон улсад нэртэй энтертайнмент шоу болох “Авьяаслаг мон­гол­чууд” шоу нэвтрүүлгийн шүүгчээр сонгогдсон. Шоу саяхнаас эфирээр цацагдсан ч ажил нэлээд эртнээс эхэлсэн дуулдсан. Одоо яг ямар шатандаа яваа вэ?

-Шүүгчийн шатны шалга­руулалт явагдаж байна даа.

-Танд анх шүүгч хийх саналыг хэрхэн тавьсан бэ. Та бас яаж хүлээж авав?

-Авьяастныг тодруулах шоуны шүүгчээр ажиллах хариуцлагатай бөгөөд хүндтэй саналыг тавьсан. Би энэ шоуны олон улс дахь форматыг мэдэж байсан учраас, хийх ёстой ажил минь байна гэж бодож хүлээн авсан даа.

-“Авьяаслаг мон­гол­чууд” шоу өмнө гарч байсан шоу нэвтрүүлгүүдээс илүү шинэлэг байна. Анхны дугаараас л үзэгч ихтэй байсан. Үзэгчдийг байлдан дагуулж буй гол хүчин зүйл нь юунд байна вэ?

-Маш олон зүйл нөлөөлсөн. Хамгийн түрүүнд би шоуны баг хамт олны багаар ажиллах чадварыг хэлмээр байна. Тэд маш нарийн зохион байгуулалттай ажиллаж байгаа. Олон цагаар ажиллаж байгаа ч тэр хамт олноос сөрөг уур амьсгал мэдрэгдээгүй. Зөрсөн хүн бүр инээмсэглэл тодруулсан, уриалгахан залуус байдаг. Би тэднээс эрч хүч авч ажиллаж байсан гэж хэлж болно шүү. Дараагийн онцлох зүйл бол мэдээж авьяастнууд маань шүү дээ.

-Америкийн болон бусад орны яг адил шоу нэвтрүүлгийг хэт дуурайсан гэх хүмүүс бас байна. Үндэсний хэв маягаа агуулах ёстой юм уу, яг стандартаар хийх ёстой байдаг юм уу?

- Албан ёсны эрхийг авсан учраас тусгай стандартын дагуу хийх ёстой. Энэ шоу бол аль ч улсад нэг л стандарт форматаар хийгддэг. Үүнийг манайхан хараахан сайн ойлгохгүй л байх шиг байна. Харин оролцож байгаа авьяастнуудын хувьд үндэсний хэв шинжээ хадгалсан үзүүлбэр үзүүлэх нь нээлттэй шүү дээ. Тэр тусмаа үндэсний өв соёл, язгуур урлагтай гэдгээрээ манай орны авьяастнууд бусад улс орнуудаас онцлог.

-Нэвтрүүлэгт нийт хичнээн хүн оролцсон бэ. Түүнээс хэд нь хоёрдугаар шатанд тунаж үлдэв?

-Нээлттэй шатны шалгаруулалтад Монгол орны өнцөг булан бүрээс хоёр мянга гаруй оролцогч оролцсон гэж байсан. Үүнээс бид эхний шатандаа 250 орчмыг нь үзсэн. Энэ шатнаас тэнцүүлсэн нийт оролцогчдоо дахин шигшиж хагас шигшээд үлдэх 32-ыг шалгаруулдаг журамтай. Энэ зарчмаар л явна даа.

-Таныг гайхшруулж, инээлгэж, уяраасан үзүүлбэр хэр их гарав?

-Зөндөө байсан. Хамгийн том жишээ бол хоёрдугаарт оролцсон Дарханы дуучин хүү, барилгачин мэргэжилтэй Отгонбаяр байв. Маш сайхан хоолойтой хүү. Би бүр хамтарч ажилламаар байна гэдгээ ч хэлээд авсныг үзэгчид мэдэж байгаа байх. Онцлоод яривал олон хүн бий.

-Шүүгчээр суухдаа уярч уйлсан тохиолдол байгаа юу?

- Өө байлгүй яахав. Гэхдээ уярч гэхээсээ илүү бахархаж нулимс дуслуулж байлаа.

-Гарсан даруйдаа үзэгчдийн дэмжлэгийг олж чадсан оролцогчдын нэг нь Ховдын Чойсүрэн гэж сошиалаар их бичигдэж байна. Та энэ залууг тайзан дээр гарч ирэхэд ямар сэтгэгдэлтэй байв?

-За энэ залуу ч дээ гэж бодож байсан нь үнэн (инээв). Шүлэг нь нэг их онцгой байгаагүй. Гэхдээ өөрийн гэсэн хүн татах увдис түүнд байна лээ. Өөрийнхөөрөө байж чадсан.

-Мөн түргэн хэллэг хэлдэг Пунсалдулам эгчийн үзүүлбэр сонирхолтой санагдаж байсан. Ардын язгуур урлагаа түгээх том боломж энэ тайз мөн үү?

-Мэдээж мөнөөсөө мөн. Түргэн хэллэгийн уралдаан болж байна гэж ойр хавьд сонссонгүй. Тэгэхээр тэр хүн “Авьяаслаг монголчууд”-ын шоуны тайзыг зорихоос яах вэ. Энэ л манай шоуны гол онцлог. Зөвхөн энэ тайзан дээр л тэр хүн өөрийгөө харуулах боломж нь нээгдсэн.

-Таны хувьд шүүгчээр ажиллах хүнд байна уу. Ажлын ачаалал хэр байна вэ?

-Хүнд гэж хэлэхэд хэцүү. Би түрүүн хэлсэн. Өөрийн минь хийх ёстой ажил гэж бодож байгаа учраас би ажлаа чин сэтгэлээсээ хийхийг хичээдэг. Тиймдээ ч тэр эрчээрээ явна. Гэхдээ урьд өмнө нь ийм урт цагаар телевизийн бичлэгт орж байгаагүй юм билээ. Энэ л хүндэвтэр санагдаж байгаа даа. Гэхдээ зүгээр ээ, нэг л мэдэхэд цаг өнгөрсөн байдаг.

-Бусад шүүгчидтэйгээ маргалдсан гэж дуулсан. Санал нийлэхгүй зөрөлдөх тохиолдол их гардаг уу?

-Мэдээж зөндөө гарна шүү дээ. Заримдаа шүүгчдийн дийлэнх саналаар дийлэгдэх үе байна. Гэхдээ дөрвөн өөр өнцөг, дөрвөн өөр үзэл бодол байж жинхэнэ авьяасыг нээх болов уу. Мөн эцсийн мөчид бид дөрөв санал нэгтэйгээр л дуусдаг даа.

-Оролцогчид юун дээр их алдаж байсан бэ?

-Шоу явагдах дүрэм журмаа сайн ойлгохгүй, дараагийн шатанд гэж үзүүлбэрээ нөөж байгаад тэнцэхгүй гарсан оролцогчид олон байгаа. Мөн хийж байгаа үзүүлбэрээ сэтгэлээсээ бүр эмоцио гаргаж чадахгүй байгаад алдаж байсан. Бас үзүүлбэрээ буруу сонгох нь оролцогчдын нийтлэг алдаа болж байгаа даа.

-Нэвтрүүлгийн хамгийн залуу болон хамгийн настай оролцогчид хэд хэдэн настай вэ?

-80 гарсан авьяастан байсан. Хамгийн залуу нь зургаан настай охин байсан.

-Энэ нэвтрүүлгийн ач холбогдлыг хэрхэн харж байна. Дэлхийн хэмжээний одыг гаргаж ирэх боломж хэр байна?

-Мэдээж байгаа. Энэ л шоуны гол мөн чанар.

-Нэвтрүүлгийн тайзны үзэгчээр оролцох хүсэлтэй хүмүүс яаж холбогдох вэ?

-Би сайн мэдэхгүй юм. Зохион байгуулагчдаас асуусан нь дээр болов уу. Монгол HD телевизийн фэйсбүүк хуудас энэ талын мэдээллийг маш сайн өгдөг.

-Та оролцогчдодоо юу гэж зөвлөх вэ?

-Өөрийнхөөрөө л бай гэж хэлмээр байдаг. Одоо ч тэгж хэлмээр байна. Мөн үнэхээр сайхан авьяастай оролцогчид сандарснаасаа болоод бүдэрдэг. Тэр үед нь хайран юм л гэж боддог доо. Тайзан дээр гарсан тэр мөчдөө бүх зүйлээ тултал нь гарга, бүх боломжоо бүрэн ашигла гэж хэлмээр байна.

-Энэ шоуны зардал тэрбум төгрөгөөс даваад явсан тухай сонсогдож байсан. Ийм зарлагыг энэ салбараас нөхнө гэж байхгүй байх?

-Гэр бүлээрээ үзээд суух зүйлгүй байгаа өнөө үед энэ шоу цагаа олж хийгдсэн. Нийгэмд баяр баясал бэлэглэж байна. Тиймээс гэр бүлийн тэр сайхан уур амьсгалыг, монголчуудын тэр их авьяасыг тэд эд гэж мөнгөөр хэмжих учир дутагдалтай. Нөгөөтэйгүүр телевизийн шоуг хэрхэн яаж хийхийн тод жишээ болсон байх. Бас нэг зорилго нь монгол авьяасыг дэлхийд таниулах боломж шүү дээ. Энэ шоунд цаг нар, хөрөнгө мөнгөө зарцуулж байгаа хүмүүс зөв зүйл хийж байгаад 100 хувь итгэлтэй байна.

-Гадаадын ийм шоуны шүүгчид хамгийн нэр хүндтэй хүмүүс байдаг. Бас тэдний цалин пүнлүүний асуудал дандаа бичигддэг. Тэгэхээр танаас энэ талаар асуухгүй өнгөрч болохгүй болов уу?

-Гэрээний дагуу би үүнийг нууцлах ёстой. Гэхдээ оюуны өмчийг дээдэлдэг, авьяасыг үнэлж чаддаг хамт олонтой ажиллаж байгаадаа баяртай байна. Тэд миний авьяасыг үнэлж цалин пүнлүүгээ тогтоосон биз. Тэдний өгч байгаа хөлс мөнгөнд би сэтгэл хангалуун байгаа.