ХХААХҮ-ийн дэд сайд Г.Батсуурь ОХУ-ын “Русская кожа” хувьцаат нийгэмлэгийн Худалдаа хариуцсан захирал Дмитрий Круглов тэргүүтэй төлөөлөгчдийг хүлээн авч уулзлаа.

“Русская кожа” хувьцаат нийгэмлэгийн төлөөлөгчид “Монгол Улсын Хөдөө аж ахуйн бирж” ХХК-тай 2019 онд байгуулсан арьс ширэн түүхий эд бэлтгэн, нийлүүлэх чиглэлээр хамтран ажиллах тухай санамж бичгийн хүрээнд хамтын ажиллагаагаа өргөжүүлэн хөгжүүлэхээр иржээ.

Уулзалтын үеэр төлөөлөгчид Монгол Улсад хөнгөн үйлдвэрийн салбарыг хөгжүүлэх, тэр дундаа арьс ширэн түүхий эд боловсруулах, нэмүү өртөг шингэсэн эцсийн бүтээгдэхүүн үйлдвэрлэн зах зээлд нийлүүлэх нөөц боломж байгааг онцлоод, ОХУ-д өөрсдийн хуримтлуулсан туршлага, үйлдвэрлэлийн технологиос хуваалцах, “Русская кожа” хувьцаат нийгэмлэгийн үйлдвэрт боловсон хүчин бэлтгэх, дадлагажуулахад хамтран ажиллах боломжтойг илэрхийлсэн юм.

ХХААХҮ-ийн дэд сайд Г.Батсуурь: “Монгол Улсад 2021 оны 12 дугаар сард урьдчилсан байдлаар 67,3 сая толгой мал тоолсон. Жил бүр дунджаар 15-17 сая ширхэг бог, бодын арьс бэлтгэдэг. Дотоодын арьс ширний үйлдвэрүүд тодорхой хэмжээг нь боловсруулдаг ч хүчин чадлын хэмжээ хангалтгүй байгаа тул Засгийн газраас анхаарч, Ховд, Дархан-Уул аймагт үйлдвэр, технологийн парк байгуулахаар мөрийн хөтөлбөртөө тусган, шаардлагатай санхүүжилтийг шийдээд байгаа” гэв.

ХХААХҮЯ-ны төлөөлөгчид өнгөрсөн оны 10 дугаар сард “Русская кожа” хувьцаат нийгэмлэгийн Заринск хот дахь “Русская кожа Алтай” үйлдвэрийн үйл ажиллагаатай танилцан, туршлага судлан, үйлдвэрийн удирдлагуудтай уулзжээ.

“Русская кожа” хувьцаат нийгэмлэг нь 6 үйлдвэр, аж ахуйгаас бүрдэх групп компани бөгөөд дэлхийн зах зээлд гүн боловсруулсан арьс шир, эцсийн бүтээгдэхүүн нийлүүлэгч, салбартаа тэргүүлэх компанийн нэг. Тус компани нь ОХУ-ын Рязань, Заринк хот болон Испани Улсад арьс ширний үйлдвэртэй, БНХАУ, Португал Улсад салбар компанитай аж.