Уг нь "Сос Медикал Монголиа" АНУ-д төвтэй олон улсын байгууллагаас итгэмжлэлээ авчихсан гэнэ. Гэсэн ч “Оюутолгой”-гоос ISO итгэмжлэлийн гэрчилгээтэй бол ажилчдынхаа ковидын шинжилгээг хийлгэнэ гэсэн нөхцөл тавьжээ. Ингээд Үндэсний итгэмжлэлийн төвөөс итгэмжлэл авах “ажиллагаа” эхэлжээ. Гэхдээ итгэмжлэл авахын тулд эхлээд Техникийн хорооноос дүгнэлт гаргуулах учиртай. Гэтэл уг хурлаар “Медика Монголиа” стандартын шаардлага хангаагүй гэж үзээд хагас жилийн хугацаа өгөх шийдвэр гарчээ. Тодруулбал “ажлын байр, лабораторийн орчин”-г хангаагүй тул ковидын ПСР шинжилгээ хийхгүй гэжээ. Ингэснээр “Оюу Толгой” компанийн захиалгыг алдах аюулд хүрсэн. Гэсэн ч “яаж ийгээд” эмнэл зүйн лабораторийн итгэмжлэл авч чаджээ. Итгэмжлэлийг дүгнэлт байтугай бүр тушаал гараагүй байхад авч чадсан байна. Энэ тухай үнэн явдлыг ҮИТ-ийн Бодлогын хэрэгжилтийг зохицуулах газрын мэргэжилтэн З.Үлэмжзаяа мэдүүлжээ. Ажилд ороод наймхан сар болж байсан тул даргадаа, бусдад гай болохгүй, мөн дарга ажлаас халагдвал дагаад ажилтнууд өөрчлөгдөх байх гэж айсандаа эхлээд “миний ажлын хариуцлагагүйгээс болж тушаал гаргахгүй удааширсан” гэх маягаар мэдүүлэг өгчээ. Дараа нь бууж өгөн жинхэнэ үнэнийг өчсөн байна. Техинкийн хорооны дүгнэлт гарахаас өмнө “Медика Монголиа”-гийн итгэмжлэлийн гэрчилгээ гарчихсан байжээ. Үүнийг С.Соронболд дарга тэр хоёр л мэдэж байсан гэнэ. Дарга нь “... Медика Монголиад гэрчилгээ гаргачихгүй юу даа, Заяа...” гэжээ. Ингээд 2022 оны 1-р сарын 14-нд L18 дугаартай гэрчилгээг гаргаж даргадаа өгчээ. Өрөөнд нь ороход гэрчилгээ авах гэсэн “Медика Монголиа”-гийн хоёр хүн байсан аж. Хоёр долоо хоногийн дараа “Медика Монголиа”-гийнхан техникийн хурлын тэмдэглэлээ авъя гэж Аззаяагаар хэлүүлжээ. Гэтэл тэр үед тэмдэглэлээ ч буулгаагүй байсан. Тэгтэл итгэмжлэлийн асуудлыг гардан хариуцаж байсан ажилтан М.Мөнгөнбаяр хурлын видео бичлэгийг хоёрхон өдөрт буулгаад өгчээ. Тэмдэглэлийн “үнэн зөв” гэдэгт Үлэмжзаяа, “хянасан” дээр өөрөө гарын үсэг зурсан байна. Хурлын тэмдэглэл ингээд болсон ч тушаал гараагүй байжээ. Цагдаагаас ирээд явсаны дараа л С.Соронзонболд дарга тушаал гаргахыг үүрэгдсэн тул “Медика Монголиа”-д нэг жилийн хугацаатай итгэмлэл олгох тушаалыг нөхөж гаргажээ. Ийнхүү техник хурлын шийдвэргүй, тушаалгүйгээр итгэмжлэл авсан байна. Мөрдөн байцаалтын үед хахууль авсан гэх үйлдэл тогтоогдоогүй гэнэ. Гэхдээ С.Соронболдыг албан тушаалаа ашиглаж “Медика Монголиа”-д давуу байдал олгосон гэж үзэн 7,2 сая төгрөгөөр торгожээ. Экс дарга итгэмжлэлийн хэргийг хариуцсан М.Мөнхбаяр гэдэг ажилтандаа их “гомдсон” нь мэдүүлгээс харагдсан. Тэрээр “... Мөнгөнбаяр ах бол уг нь энэ талаар сайн мэдэж байсан. Тухайн үедээ бага зэрэг уймарч, яарсан юм уу ямар ч байсан тайлангаа бичиж ирүүлснийг нь хурлаар оруулахдаа миний зас гэснийг засаарай гэсэн чинь засаагүй явуулчихсан байсан...”, “... Би уг нь тухайн үед Мөнгөнбаяр ахад маш их итгэдэг байсан ба харьцангуй туршлагатай юм чинь дүрэм, журмынхаа дагуу хийсэн байх гэж бодсон чинь болоогүй байсан...” гэх мэтээр “бухсан” юм ярьжээ.