Өнгөрсөн даваа гарагт болсон газар хөдлөлтийн улмаас нурсан барилгуудтай холбогдуулан 113 хүнийг баривчлах тушаал гарсан талаар Туркийн албаны хүмүүс мэдэгдлээ. Туркийн цагдаа нар барилгын гүйцэтгэгчдийг оролцуулаад 12 хүнийг баривчлаад байгаа аж. Үүний зэрэгцээ Туркийн өмнөд хэсэгт эмх замбараагүй байдал үүсэж, зарим газарт аврах ажиллагааг тасалдуулжээ. Турк, Сирид нас барсан хүний тоо 28 мянга даваад байгаа юм. Илүү олон хүнийг баривчилж холбогдох хэргийг үүрүүлэх болно гэдгийг Туркийн Засгийн газраас мэдэгдсэн боловч энэ үйлдлийг олон нийт гамшгийн бурууг өөр тийш нь шилжүүлэх оролдлого гэж үзэж байна. Сонгууль дөхөж байгаа энэ үед 20 жил төр барьсан Ерөнхийлөгчийн ирээдүй ганхаж байна. Тус улсын Ерөнхийлөгч Эрдоган хариу арга хэмжээ удаан байсныг хүлээн зөвшөөрсөн ч гамшгийн бүсэд зочлохдоо “Иймэрхүү зүйл үргэлж л гарч байсан. Энэ бол хувь тавилан” хэмээсэн юм. Газар хөдлөлт болсноос хойш зургаа дахь өдөр байдал улам хурцдаж байна. Бямба гарагт Хатай мужид нэр нь үл мэдэгдэх бүлэглэлийн хооронд мөргөлдөөн гарсан тул Германы аврагчид болон Австрийн арми эрэн хайх ажиллагааг түр зогсоов. Хүнсний нөөц багасаж байгаа тул аюулгүй байдал улам дордох төлөвтэй байна. Австрийн дэд хурандаа Пьер Кугелвейс “Турк дахь бүлэглэлүүдийн хооронд түрэмгийлэл нэмэгдэж байна” гэжээ. Туркийн өмнөд хэсэг болон Сирийн хойд хэсэгт сая сая хүн орон гэргүй болж, агаарын температур улам бүр хүйтэрсээр байна. Түүнчлэн газар хөдлөлтийн улмаас амиа алдагсдын тоо хоёр дахин нэмэгдэх магадлалтайг тусламжийн агентлагууд анхааруулж байна.
https://www.bbc.com/news/world-middle-east-64615349
Newspress.mn
