УИХ-ын чуулганы өчигдрийн хуралдаанаар даваа гарагт өргөн барьсан “Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийн төсөл болон хамт өргөн мэдүүлсэн хуулийн төслүүдийг хэлэлцэх нь зүйтэй хэмээн анхны хэлэлцүүлэгт шилжүүлсэн.
Чуулганы нэгдсэн хуралдаанд 41 гишүүн оролцож, 35 нь дэмжсэнээр ийнхүү уг хуулийн төслийг хэлэлцэхээр болсон юм.
Хуулийн төслийг хэлэлцэхээс татгалзсан зургаан гишүүнд
- С.Бямбацогт
- Б.Жавхлан
- Х.Нямбаатар
- Ш.Раднаасэд
- А.Сүхбат
- Н.Учрал нар орж байна.
Засгийн газраас өргөн мэдүүлсэн уг хуулийн төслийг УИХ дахь МАН-ын бүлэг хэлэлцэн дэмжсэн ч МАН-ын зарим гишүүд байнгын хорооны хуралдааны үеэр гарч болох эрсдэлүүдийг хөндөж байсан юм. Гэвч УИХ-ын гишүүн Я.Содбаатар бүлэг нэгэнт дэмжсэн гэдгийг сануулж байв.
УИХ-ын Нийгмийн бодлого, боловсрол соёл, шинжлэх ухааны байнгын хорооны хуралдаанаас тэтгэврийн зээл төлөх дээд хязгаарыг зургаан сая төгрөгөөр тогтоох чиглэл өгөөд байгаа бол Эдийн засгийн байнгын хорооны хуралдааны үеэр ҮАБЗ-ийн зөвлөмж зарлагдахаасаа өмнө задарч, 100 тэрбум орчим төгрөгийн зээлийг мэдээлэлд ойр хүмүүс авсан гэх асуудлыг нягтлах чиглэл өгөөд байгаа юм.
Өнөөдөр хоёр байнгын хороо болон УИХ-ын чуулган хуралдана. Мөн УИХ дахь МАН-ын бүлэг хуралдаж магадгүй мэдээлэл байна.
