УИХ-ын гишүүн Р.Гончигдорж Монгол Улсын Ерөнхийлөгчийн зүгээс Өршөөлийн хуульд тавьсан хэсэгчилсэн хоригийг дэмжихийг эрс эсэргүүцэж байгаа энэ үед Н.Алтанхуягийн ахлах зөвлөх асан Л.Гансүх нарыг шүүх хурал болж байна. “Алтангадас”-ын гол лидерүүд ийнхүү чуулганы танхимд цөөнх болж, шүүхийн танхимд шүүгдэгч болон зогсож байгаатай зэрэгцэн нэгэн хачирхалтай мэдээлэл сонсогдох боллоо. 

Тодруулбал, “Л.Гансүх Байгаль орчин, аялал жуулчлалын сайд байхдаа “Randon Horse” ХХК-д дархан цаазат Шажин хурхын аманд 45 га газар олгосон юм уу. Хэрэв тийм бол Гончигоо гишүүн Ерөнхийлөгчийн хоригийг хэлэлцэх үеэр “Бүгдээрээ нэг шугамнаас эхэлье” гээд байсан нь учиртай байж. “Л.Гансүх ял сонсчихвол би яана аа” гэдэг айдас Н.Алтанхуягт байгаачлан Гончигоо гишүүнд бас байгаа юм биш биз. Тэр барьцаанд орчихоогүй байгаа?!” гэх элдэв хардлага, таамаг дагуулсан яриа Төрийн ордонд өрнөж эхэлжээ. Эх сурвалжийн хэлснээр, энэ явдал Л.Гансүхийг сайд байхад болсон гэнэ. Учир нь “Randon Horse” ХХК нь Р.Гончигдоржийн эхнэр Д.Хишигт болон түүний дүү Д.Чинзориг нарын нэр дээр байдаг сурагтай. Харин одоо үүнийг Р.Гончигдорж гишүүнээс лавлаад асуучихмаар байгаа юм даа. “Эрхэм гишүүн ээ, энэ үнэн үү. Хэрэв үнэн бол эхнэр тань дархан цаазат газарт өөрийн гэсэн газартай болохын тулд хэр өндөр үнэ төлсөн бэ” гэж.