Улсын хэмжээнд 2023 онд тээврийн хэрэгслийн хяналтын цахим гэрчилгээг суурилуулах, хэрэглээнд нэвтрүүлэх ажлыг зохион байгуулахаар бэлтгэл ажлыг хангаад буй. Цахим гэрчилгээг хэрэглээнд нэвтрүүлснээр зам тээврийн нэгдсэн системийн тогтолцоо бүрэн хэрэгжих нөхцөл бүрдэх юм. Нийслэл хотын хувьд зам тээврийн нэгдсэн системийн дэд бүтцийг үе шаттай бий болгохоор 2022 онд дараах ажлуудыг зохион байгуулсан. Үүнд:
- RFID уншигч төхөөрөмжийн дэд бүтцийн ажил;
- Нийслэлийн авто тээврийн шалган бүртгэх товчооны цахим төлбөрийн систем;
- Хяналтын камерын систем;
- Тээврийн хэрэгслийн нэгдсэн цахим үйлчилгээний “SMARTCAR3.0” систем;
- Зам тээврийн хяналтын дашбоард /сити дашбоард/;
- Улаанбаатар хотын авто замын газрын зургийн суурь систем зэрэг багтсан.
Нийслэлийн Засаг даргын Эдийн засаг дэд бүтцийн асуудал хариуцсан нэгдүгээр орлогч Ж.Сандагсүрэнгээр ахлуулсан Ажлын хэсэг хуралдлаа. Хурлаар:
- Нийслэлийн авто замын гэрлэн дохиотой уулзваруудад RFID уншигч төхөөрөмжүүдийг нийлүүлэх, угсарч суурилуулах;
- Энхтайваны өргөн чөлөөний нэгдүгээр эгнээг зөрчил илрүүлэх камераар тоноглох;
- Баянгол дүүрэг, модны 2 болон Тээврийн дээд сургуулийн урд уулзварыг иж бүрэн камержуулах;
- Нийслэлийн шалган нэвтрүүлэх товчоодод цахим төлбөр, хураамжийн системийг сайжруулах, төлбөрийн нэхэмжлэх үүсгэх, төлбөрийн нэгдсэн системд холбох, тоног төхөөрөмж угсарч, суурилуулах;
- Тусгай зориулалтын тоног төхөөрөмжөөр тоноглогдсон хөдөлгөөнт эргүүлийн машин ажиллуулах зэрэг ажлын явцын талаар хэлэлцлээ.
Зам, тээврийн нэгдсэн системийн төслийг хэрэгжүүлэхэд чиг үүргийн байгууллагуудаас гадна иргэн бүрийн оролцоо чухал гэдгийг ажлын хэсгийн ахлагч Нийслэлийн Засаг даргын Эдийн засаг дэд бүтцийн асуудал хариуцсан нэгдүгээр орлогч Ж.Сандагсүрэн онцолсон юм. Тиймээс төсөл хөтөлбөрүүдийн хэрэгжилтийн явцын мэдээллийг улирал бүр тайлагнаж ажиллахыг Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжид анхаарууллаа.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
