Намууд нэр дэвшигчдээ тодруулж дууссантай холбоотойгоор манай сайт хэн, хэн хаана нэр дэвшихийг та бүхэндээ багцлан танилцуулж байна. Бид энэ удаад Орхон аймаг буюу Эрдэнэт хотыг сонгож нэр дэвшиж байгаа нэр дэвшигчдийг танилцуулж байна.
46 дүгээр тойрог:
Энэ тойрогт МАН-аас УИХ-ын гишүүн Отгонбаярын Содбилэг харин АН-аас “Зэс эрдэнийн хувь” тодотголтой Д.Алтанхуяг нар нэр дэвших юм. МАН-аас нэр дэвшиж байгаа О.Содбилэг 2012 онд эрдэнэтчүүдийн дэмжлэгээр УИХ-д сонгогдож өнгөрсөн хугацаанд аймагтаа багагүй ажил хийсэн гэлцдэг. Харин Д.Алтанхуягийн тухайд 2011 оноос “Эрдэнэт” үйлдвэрийн овоолгыг ашиглаж эцсийн бүтээгдэхүүн үйлдвэрлэх үйлдвэр байгуулах, үйлдвэрээ барихдаа иргэдээс мөнгө босгох талаар сэтгэж энэ асуудлаар багагүй хугацаанд эсэргүүцлийн жагсаал зохион байгуулж явсан нэгэн юм. Тэдэнтэй МАХН-аас Д.Оюунбат, Тусгаар тогтнол эв нэгдэл эвслээс Ц.Нарантуяа нар нэр дэвшиж өрсөлдөнө.
47 дугаар тойрог:
Энэ тойрогт өрсөлдөөн ширүүхэн өрнөх төлөвтэй байна. Учир нь МАН-аас Д.Атармаа, АН-аас Д.Одхүү, МАХН-аас УИХ-ын гишүүн О.Баасанхүү,Тусгаар тогтнол эв нэгдэл эвслээс Ц.Сарантуяа нар өрсөлдөх юм. МАН-аас нэр дэвшиж байгаа Д.Атармаагийн тухайд энэ удаагийн Засгийн газарт багагүй хугацаанд Эрүүл мэнд спортын дэд сайдаар ажиллаж байсан туршлагатай нэгэн. Д.Одхүү ч мөн адил хүчтэй өрсөлдөгч. Өмнө нь УИХ-ын гишүүнээр сонгогдож байсан одоогоор Эгийн голын усан цахилгаан станцын даргын албыг хашиж буй юм. Мөн УИХ-ын гишүүн О.Баасанхүүгийн тухайд МАХН-аас тус аймагт нэр дэвшихээр он гарснаар шийдэж үе үе Орхоныг зорьж байсан. Өмнөх парламентад МАХН-аас санаандгүйгээр буюу жагсаалтад гэнэт багтан УИХ-ын гишүүн болсон түүнд Орхон аймгийн иргэд итгэл үзүүлэх эсэх нь эргэлзээтэй юм.
48 дугаар тойрог:
Энэ тойргийн "акул" нь МАН-аас нэр дэвшиж байгаа УИХ-ын гишүүн асан Д.Дамба-Очир юм. Тэрбээр Харин АН-аас Б.Мягмарсүрэн, МАХН-аас Л.Ариунаа, Ж.Лхагвадорж нар дэвшинэ. Д.Дамба-Очир нь 2008-2012 оны парламентад УИХ-ын гишүүнээр ажиллаж тухайн үед Эрдэнэтэд зэс хайлуулах үйлдвэр байгуулах ажлыг багагүй “явуулсны” хүчинд тус ажил бодитоор хэрэгжиж эхэлсэн юм. Харин АН-аас нэр дэвшсэн Б.Мягмарсүрэн тус аймгийн ИТХ-ын даргын сонгуульт ажилтай юм. Мөн энэ тойрогт Ард түмнээ хайрлая намын дарга УИХ-н гишүүн Эрүүл мэндийн сайд асан Л.Гүндалай нэр дэвшихээр бэлдэж байгаа билээ. УИХ-д Хөвсгөлөөс хоёр сонгогдсон тэрээр энэ удаад Эрдэнэтээс хүч сорихоор болж байна.
Д.ЖАРГАЛ
