Сонгуулийн чимээ хаалга тогшиж, томсгосон тойрогт хэрхэн өрсөлдөх тухай толгой гашилгасан хүмүүс олон болжээ. Тэр ч бүү хэл жижиг тойрогт, нэг аймгийн хэмжээнд санал цуглуулж чадаагүй нөхөд хүртэл санаархаж байна. Тэдний нэг бол өнгөрөгч 2020 онд Дорноговь аймагт нэр дэвшээд өвдөг шороодсон Д.Алтангэрэл юм. Түүнийг хүмүүс танихгүй байх. Харин эхнэрийнхээ хавиргыг хугартал зодож, байнга дарамталдаг байсан асуудлаар шүүх цагдаа болж явсан, “НЭТ капитал”-ын Д.Сүндий гэгч нөхрийг андахгүй. Тэгвэл Д.Алтангэрэл нь түүний төрсөн ах юм.

Түүнийг танилцуулах үүднээс үүнийг дурдаж байгаа бөгөөд өнгөрөгч 2020 оны сонгуулиар түүний дүү Д.Сүндий Чингэлтэй дүүрэгт нэр дэвшиж, гэр бүлийн маргаан, зодоон цохион гээд алдарт хүрсэн хүн.

Д.Алтангэрэлийг бүр сайн танилцуулъя. Түүний ээж ахан дүүс нь Дорноговь аймгийн хэмжээнд зүдэрсэн иргэдэд сар бүр олгодог халамжийн тэтгэврийг иргэний үнэмлэхний хамт барьцаалан зээл өгдөг. Ингэхдээ өдрийн 0,5-0,7 хувийн буюу сарын 15, жилийн 180 хувийн хүүтэй зээл олгодог. Тэд зөвхөн иргэдийн халамжийн дэвтэр барьцаалан зээл олгодог. Ингэхдээ өөрсөддөө итгэмжлэх хийлгэдэг. Ингээд сар бүрийн нэгэнд Төрийн банкин дээр очин зээл авсан иргэдийн мөнгийг авдаг “мөнгө хүүлэгчид” гэж болно.

Д.Алтангэрэл 2020 оны сонгуулиар чухам юу бодож сонгуульд өрсөлдөснийг мэдэхгүй юм. Яаж ч бодсон тус аймгийн зүдэрсэн иргэдийн халамжийн тэтгэврийг мөнгө хүүлэх замаар цөлмөчихөөд эргээд тэднээсээ “Намайг сонгооч” гээд очихоор хэн сонгох юм бэ. Энэ жил бүр томсгосон тойрогт өрсөлдөхөөр горилж яваа гэдгийг эх сурвалж хэллээ. Нэг аймгийн хэмжээнд санал цуглуулж чадаагүй нөхөр томсгосон тойрогт усанд хаясан чулуу шиг алга болж таарна. Тэгэхээр АН хайран нэг мандатаа нэг муу “Мөнгө хүүлэгч”-д өгөхгүй байлгүй.