Гуравхан сая монголчууд 182 сая пакистанчуудыг ялж, Энэбишийн Цэрэндолгор онлайн уралдаанд түрүүллээ. Монголчууд эвтэй байхдаа хүчтэй гэдэг уриаг амьдрал дээр баталсан энэ үйл явдлын тухай asiarussia.ru сайтад бичжээ.

“Цэрэн турс” ХХК-ийн захирал Энэбишийн Цэрэндолгор ийнхүү "Fjällräven Polar"-ын онлайн санал хураалтад тэргүүлж, улмаар ирэх оны 4-р сард нохой хөллөн Арктикийг байлдан дагуулахаар зэхэж байна.

Анх пакистанчууд өөрсдөө энэхүү онлайн уралдаанд монголчуудыг уриалан, өдөөн хатгасан гэхэд болно. Сүүлдээ 2-хон хүн буюу Монголын Цэрэндолгор, Пакистаны Мойн Хан нар тэргүүлэгчдийн эгнээнд үлдсэн. Пакистаны хүн ам 182 сая тул тэд өөрсдийгөө ялна гэж бат итгэж байсан байх.

Аз болоход Монгол Улсын хүн амаас гадна буриадууд, халимагууд гээд бүх дэлхийн монголчууд энэхүү онлайн уралдаанд нэгдэж чадлаа.

Ингээд эцэст нь Цэрэндолгор 48'583 санал авч түрүүлсэн бол Мойн Ханд нийт 39'293 хүн санал өгсөн байна. Өөрөөр хэлбэл, манай Цэрэндолгор бараг 9000 санал илүү авч, түрүүллээ.

Эх сурвалж: Zaluu.com