МАН засгийн эрхийг гартаа авснаасаа хойш албан тушаалын бялуу хуваахыг харин ч нэг жинхэнэ утгаар нь үзүүлж өгсөн дөө, хөөрхий. Ингэхдээ даргын цүнх барьж улстөрд хөл тавьсан олон ч нөхдүүдэд овоо том хэрчим бялуу өгч “ДАРГА” сэтрийг зүүлгэсэн нь нууц биш.
Эдгээр бялуунд дуртай БАЦААН”-уулын нэг нь УИХ-ын гишүүн Н.Учралын цүнх баригч гэгдэж хэвлэлүүдээр цоллогдож байсан хотын орлогч дарга Д.Ихбаяр.
Тэрбээр Д.Сумъяабазарын багт нийслэлийн Инноваци, технологийн асуудал хариуцсан төслүүдийн удирдагчаар томилогдон ажиллаж байгаа. Энэхүү албыг авснаасаа хойш дорвитой ажил хийгээгүй гэдгийг хамт ажиллагсад нь шивэр авир хийдэг.
Д.Ихбаярын хувьд төрийн албанд мэргэшээгүй, УИХ-ын гишүүн Н.Учралыг дагаж явсны хүчинд улстөрд хөл тавьж БГД-ийн Гэр бүл хүүхэд залуучуудын хөгжлийн хэлтсийн дарга, тус дүүргийн ЖДҮ-ийг дэмжих төвийн дарга, СХД-ийн Хүнс, худалдаа үйлчилгээний хэлтсийн дарга зэрэг албан тушаалуудыг хашсан нэгэн. Түүнийг төрийн албаны туршлагагүй хэрнэ Д.Сумъяабазарын багт Н. Учрал, Ж.Ганбаатар нарын дэмжлэгтэйгээр томилогдсон гэдгийг захын хүн хэлээд өгнө.
Намдаа олон жил зүтгэсэн мундагчууд эл албан тушаалд очихыг горилсон ч улстөрд дэмжлэгтэй том артай Д.Ихбаяр мэтийн нөхдүүд ийнхүү тохоон томилогдсон нь одоо ч намынхаа залуусын уур унтууцлыг хүргэсэн хэвээр буй юм.
Төрд хийж гийгүүлсэн зүйлгүй ч нөлөө бүхий улстөрчийн дэмжлэгтэйгээр хэр баргийн аавын хүүгийн хүсээд ч очдоггүй албан тушаал буюу Хотын орлогч даргын суудалд заларсан түүнд уурлаж унтууцалгүй ч яах билээ.Гэхдээ “Тэнгэрийн умдаг” гээчийг атгасан мэт азтай Хотын орлогч Д.Ихбаярыг ирэх жилүүдэд хэрхэн яаж ажиллахыг харахаар хүлээж суух л үлдлээ.
Том зүсэм бялуу хүртсэн иймэрхүү “ЦҮНХ БАРИГЧ”-дын тухай цувралаар хүргэж, нийгэмд хяналт бий болгохыг зорьж буй юм. Тэгээд ч “ЦҮНХ БАРИГЧ” гэдэг нь улстөрийн хүрээнийхэнд бол их л ёс зүйтэй соёлтой хэллэг гэж өөрсдөө ярьдаг юм билээ. Харин өдгөө цагт бол арай өөр “Суганы үс” гээд байгаа их муухай сонсогдох ч нэг талаараа амь нэг ч юм шиг, эсвэл шар цавуугаар шалз наачихсан ч юм шигээр буугаад байдаг юм билээ.
Үгүй тэгээд “Суганы үс” ч бай, “Цүнх баригч” ч бай өдий өндөрлөгт хүрчхээд байгаа нь бас амжилт ч юм уу.
