УИХ-ын дарга Г.Занданшатар Х.Баттулгад хүссэн хариултыг нь өгөв.

Хөрөнгө оруулалтын тухай хуулийн шинэчилсэн найруулгын төсөл улс төрчдийг төдийгүй нийгмийг хоёр талцуулаад байна. Ч.Хүрэлбаатарын өргөн барьсан энэ хуулийн төслийг эсэргүүцэж өчигдөр /2024.01.10/ Ерөнхийлөгч асан Х.Баттулга шаардлага хүргүүллээ.

Харин УИХ-ын дарга Г.Занданшатар “газар бол улсын үндэс болохыг тодотгоод, газар эзэмших ашиглахтай холбоотой эрхзүйн зохицуулалтыг ард иргэд, олон нийтээр сайтар хэлэлцүүлж шийдвэрлэх шаардлагатай” гэж үзэж буйгаа илэрхийлэв.

Ийнхүү Х.Баттулгын хүссэн хариултыг УИХ-ын дарга Г.Занданшатар өгчихөв. Учир нь Х.Баттулга Ч.Хүрэлбаатарын өргөн барьсан Хөрөнгө оруулалтын тухай хуулийн төслийг эсэргүүцэж байгаагаа илэрхийлж хэвлэлийнхэнд ярилцлага өгөхдөө “уг хуулийн төслийг ирэх сонгуулийн дараа хэлэлцүүл, олон нийтийн дунд санал асуулга явуулж өг” гэж хүссэн юм.

Г.Занданшатар УИХ-ын дарга болсноороо “төлөөстэй” болсон уу...

Үндэсний аюулгүй байдлын зөвлөл /ҮАБЗ/ дээр эрх мэдэл төвлөрүүлэх процесс явагдсаар өнөөдөр төгөлдөржсөн гэж хэлж болно. Энэ үйл явцыг 2012 оноос эхлэлтэйг улс төрчид хэлдэг. Тодруулж хэлбэл тухайн үед уул уурхай, төмөрзам зэрэг их хэмжээний мөнгөн дүнтэй гэрээнүүдийн асуудлаар шийдвэр гаргах гэхээр Засгийн газар дээр биш ҮАБЗ-өөр шийдвэр гаргуулах ажиллагаа эхэлсэн. Энэ ажиллагааны эхлэлийг Халтмаагийн Баттулга тавьсан гэгддэг. Энэ тухай “Тухайн үед зарим сайд Засгийн газрын зарим шийдвэрийг ҮАБЗ-өөр шийдүүлэхээр барьж гүйн шийдвэр гаргуулчихаад, ҮАБЗ ингээд шийдчихлээ гэх байдлаар Засгийн газар дээр тулгалт хийгддэг байсан. Үүнд гадны улсын улс төрийн нөлөөлөл ч байсан” гэж тэр үеийн ХЗДХ-ийн сайд Х.Тэмүүжин өнгөрсөн жил ярьсан байдаг. Энэ үед Ерөнхий сайд нь Н.Алтанхуяг, УИХ-ын даргаар З.Энхболд, Ерөнхийлөгч Ц.Элбэгдож байв. Засгийн газарт тулгалт хийдэг энэ байдлыг эсэргүүцсэний улмаас 2014.11.05-ны өдөр Н.Алтанхуягийг огцруулсан гэхэд хилсдэхгүй.

Үүнээс хойш буюу Х.Баттулга ерөнхийлөгч болсны дараа ҮАБЗ дээр шийдвэр гаргахад дахиад нэг саад гарч ирсэн нь тухайн үеийн УИХ-ын дарга М.Энхболд байв. Түүнийг “шударга тав” гэх одоогийн Ерөнхий сайд Л.Оюун-Эрдэнэ тэргүүтэй улс төрчид мөн л улс төрөөс зайлуулж байв. Энэ үеэс ҮАБЗ дээр томоохон шийдвэрүүд гаргадаг байдал төгөлдөржсөн.

Энэ үйл явцыг ХЗДХ-ийн сайд асан Х.Тэмүүжин: “У.Хүрэлсүх Ерөнхий сайд болж, Х.Баттулга нутгийн дүү Г.Занданшатарыг УИХ-ын дарга болгосон. УИХ-ын дарга болсон хүн төлөөс төлөх ёстой. Ерөнхий сайд болсон хүн төлөөс төлөх ёстой. Тэдний төлөөс нь танд таалагдах ҮАБЗ-ийг бий болгоё. Та юу хүсч байна тэр зүйлийг хийж өгье гээд ҮАБЗ дээр эрх мэдэл үүссэн.” гэж тайлбарлаж байлаа.

Тэгвэл оны өмнөхөн Г.Занданшатар “Нэг үл үзэгдэгч л хамаг юмыг зогсоож, гацааж байна. Цахилгаан станцыг ч, газрын тосны үйлдвэрийг ч тэр. Тэр үл үзэгдэгч хүчийг хэн гэдгийг бүгд мэдэж байгаа шүү дээ” гэж хэлж байв. Тэр үл үзэгдэгч хүч нь ч өнөөдөр Хөрөнгө оруулалтын тухай хуулийн төслийг дахин гацаахаар “улайрч” байна. Тэгвэл тэр үл үзэгдэгч хүчдээ Г.Занданшатар өөрөө “төлөөстэй” юм биш биз. Тэр “төлөөсөндөө” Хөрөнгө оруулалтын тухай хуулийн төслийг унагах уу... гэсэн асуултууд ч ар араасаа хөвөрч байна. Х.Баттулга өөрийн биеэр очиж шаардлагаа өгсөн нь ч энэ хардлагыг төрүүлж байна.

Б.Мөнх-Эрдэнэ

Newspress.mn