Одоогоос гурван жилийн өмнө Налайх дүүргийн “Хаан” банкны салбарт А.Бат-Ялалт гэгч этгээд дайран орж, хоёр иргэнийг буудаж гэмтээн, нэг хүний аминд хүрсэн хэрэг гарсан. Энэхүү хэргийг шүүх хурал хоёр жил дамнан үргэлжилж, шүүх бүрэлдэхүүн гэмт этгээдэд 25 жилийн ял оноосон билээ. Нийгмийг бүхэлд нь цочроосон эл хэрэг намжиж амжаагүй шахам байхад Баянзүрх дүүргийн нутаг дэвсгэрт үйл ажиллагаагаа явуулдаг “Капитрон” банкны салбарт зэвсэглэсэн этгээд дайран орж, дээрэм хийхийг завдсан хэрэг гарлаа. Бидэнд байгаа мэдээллээр тус дүүргийн XXV хороо буюу “Sunday” худалдааны төвийн чанх урд байрлах“Капитрон” банкны салбарт энэ сарын 7-ны өдрийн 20.40 цагийн үед нүүрэндээ баг зүүсэн залуу галт зэвсгийн чанартай зүйлээр банкны ажилчдыг айлган сүрдүүлж, 20 орчим сая төгрөг аваад зугтахыг завдсан гэх. Харин эл хэргийн талаар албаны эх сурвалжаас тодруулахад“Өнгөрсөн бямба гарагт Баянзүрх дүүргийнXXV хороонд байрлах арилжааны “Капитрон” банкны салбарт 30 орчим насны этгээд дайран орж,  20 орчим сая төгрөг дээрэмдэхийг завдсан нь үнэн. Тухайн үед банкны ажилчид хэргийг таслан зогсоож, мөнгийг гэмт этгээдэд өгч явуулаагүй. Одоогоор хэрэгтнийг эрэн сурвалжилж байна. Бид түүний авч явахыг санаархсан 20 орчим сая төгрөгийг эд мөрийн баримтаар хураан авсан” гэв. Манай сурвалжлах баг халдлагад өртсөн“Капитрон” банкны салбарт очиход үүдний нэг хамгаалагчаас гадна банкны гурван ажилтан иргэдэд үйлчилж байв. Тэднээс тухайн үед яг ямар үйл явдал болсон талаар лавлахад“Хэрэг гардаг үед бидний хэн нь ч байгаагүй. Манай салбар хариуцсан дарга төв банк дээр хуралтай байгаа. Тэгээд ч хэрэг мөрдөн байцаалтын шатанд яваа болохоор тодорхой мэдээлэл өгөх боломжгүй” гэсэн юм. Энэнхүү хэргийг Баянзүрх дүүргийнII хэлтэст шалгаж эрүүгийн хэрэг үүсгэн шалгаж байна. Ойрын эх сурвалжийн мэдээлснээр, галт зэвсгийн чанартай зүйлээр зэвсэглэн, дээрэм хийхийг завдсан этгээдийг хэн болохыг тогтоосон бөгөөд улс, орон даяар эрэн сурвалжилж байгаа аж. Энэ талаар дараагийн дугаартаа эргэн мэдээлэх болно.

Эх сурвалж: Unen.mn