Төрийн хуулийн нэр барьсан дээрэмчид өнөөгийн нийгэмд улам бүр олширч гаарсаар байна уу даа гэж халагламаар үйл явдлууд нийгэмд улам бүр олширсоор байгаа нь харамсалтай.
Ингэж халаглахын учир сүүлийн жил хагасын хугацаанд хотын төвийн хөдөлгөөнд оролцож байгаа автомашинуудыг зогсоолгүй газар байрлуулбал ачдаг үйлчилгээг нэвтрүүлсэн явдал юм.
Гэвч хотын захирагчийн санаачилсан энэ ажилд манай хууль хүчнийхэн анхаарах зав чөлөө олдохгүй байна уу, эсвэл олдсон ч дуугарахыг хүсэхгүй байна уу, ямартай ч тэдний үйлдэл хэрээс хэтэрч байна.
Хэдий машин ачих нь замын хөдөлгөөнд саад учруулан тавьсан хувь хүний буруутай үйлдлээс эхтэй ч эдийн засгийн хүндрэлтэй байгаа иргэдийн хувьд бас л том асуудал. Учир нь манай нийслэлд автомашинаа зогсоох хангалттай зогсоол байгаа бил үү, дээрээс нь байгаа ганц нэгхэн автомашины зогсоол нь 30 минут тутамд 1000 төгрөг нэхэх жишээтэй.
Үүний тодхон жишээг Үндэсний цэцэрлэгт хүрээлэнгийн гаднах автомашины зогсоолоос харж болно. 30 минут зогсоход 500 төгрөг, 120 минут болбол ахиад 3000, за тэгээд 121 минутаас дээш машины тавибал 30 минут тутамд 3000 төгрөгний торгуультай гэх.
Гэтэл бүтэн долоо хоногжингоо ажил, ажил гэсээр хүүхдээ ч салхилуулж амждаггүй эцэг, эх Үндэсний цэцэрлэгт хүрээлэн нэг орохдоо дор хаяж л 2 цаг болно. Тэдгээр эцэг эхчүүд дотор зөвхөн зогсоолд 3000 төгрөг төлж байх чадалтай хүмүүс хэр олон байгаа билээ.
Ядаж их бүтээн байгуулалт, барилгажилтын ажил явагдсанаас хойш хэдэн барилгын компаниуд нь бөглөхийг нь бөглөд дээрэмдэхийг нь дээрэмдээд гаднаа тоглоомын талбайтай байр бараг үлдээсэнгүй. Энэ зэрэг шалтгаанаас үүдээд л боломж боломжийнхоо хэрээр төв замаа чөлөөлөөд замын боржур бараадуулаад тавив уу үгүй юу, буланд чимээгүйхэн отож суух нөгөө ачлагынхан хүүе гэхийн завдалгүй ачаад явах энүүхэнд.
Байран дундаас ачаад явчихдаг хүмүүст бол боржур давуулсан машин бэлэн зууш л гэсэн үг. Харамсалтай энэ үйлдлүүд хэрээс хэтэрч, бүр эзнийг нь зодоод машиныг нь дээрэмддэг болтлоо гаарсан байна.
Угтаа ачлагын компаниуд автомашиныг ачихдаа чанга яригчаар 10 минут зарлах, жолооч руу нь гурваас доошгүй удаа утасдах, ачиж байх үед эзэмшигч нь гарч ирсэн тохиолдолд сануулга өгөөд ачилгүй алгасах зэрэг дүрмийг журмаар баталсан байдаг ч өнөөдөр энэ хуулийг баримталж байгаа ачлагын компани хэд байгаа вэ? Тэднийг хэн хамгаалаад байна вэ гэдэг бас л бодох асуудал.
Мартсанаас нэг зүйлийг сануулахад ачлагын компаниуд ачсан машин тутамдаа жолоочоос 60 мянган төгрөг авдаг. Тэгвэл дээрх мөнгөнөөс ердөө 15-хан мянган төгрөгийг улсын төсөвт төвлөрүүлдэг гэнэ билээ.
Б.Хишигдэлгэр
