Өнгөрсөн долоо хоногт улс оронд өрнөсөн гол үйл явдлуудын нэг нь Эрдэнэт үйлдвэр ТӨҮГ-ын ажилчид ажил хаялт зарласан явдал байлаа. Тэдний тухайд цалингаа 50 хувиар нэмэгдүүлэх, тэтгэвэртээ гарч буй ахмад ажилчдын хүүхдүүдийг сонгон шалгаруулалтгүйгээр ажилд оруулах зэрэг шаардлагыг тавиад байсан юм. Улмаар энэ шаардлагаа тавин ажил хаялтаа зарласан ч тус өдрийн үдээс хойш Эрдэнэт үйлдвэрийн удирдлагууд болон ҮЭ-ийн төлөөлөл хэлэлцээрийн ширээний ард сууж тохиролцоонд хүрсэн байгаа юм.
Ингэхдээ цалинг үе шаттайгаар 15 хувиар нэмэгдүүлээд явна гэх байр суурийг илэрхийлж байсан Г.Ёндон болон түүний удирдлагын баг бууж өгч ажилчдынхаа цалинг 30 хувь нэмэгдүүлэхээр болсон байна. Цалингаа нэмэгдүүлэхээр тэр дундаа 50 хувиар нэмэгдүүлмээр байна гэж цамнаж байсан Эрдэнэт Үйлдвэрийн ажилчид ийнхүү ирэх оны 1-нээс эхлэн 30 хувиар нэмэгдсэн цалин авахаар боллоо. Нэг үгээр хэлбэл өндөр үнэ хэлээд дундаж үнэ дээр тохирдог зах зээл дэх арилжааны зарчмаар асуудлаа шийдүүлж чаджээ. Ийнхүү Эрдэнэт үйлдвэр ТӨҮГ -ын ажилчдын цалин эмч, багш гээд улсын бусад салбарын дундаж цалингаас улам алсарч одов.
