Сүүлийн үед Хууль зүйн сайд Д.Дорлигжав, сайд асан Х.Тэмүүжин нар “дайтах” болсон. Тэгвэл өнөөдөр Хууль зүйн сайд Д.Дорлигжав  Өмгөөллийн тухай хуулийн төслийг УИХ-ын дарга З.Энхболдод өргөн барьсан юм. Харин энэ талаарх мэдээллийн Х.Тэмжүүжин гишүүн өөрийн “Твиттер” хуудаснаа “2009 он руугаа ч буцлаа шүү. Элбэгдорж гуай нь гүлдийсээр л...” гэх тайлбартайгаар жиргэжээ. Х.Тэмүүжин гишүүний хувьд сүүлийн үед УИХ-ын чуулган, байнгын хороодын хуралдааны үеэр Ерөнхийлөгчид хаягласан хатуу үгс чулуудах болсон. Тэгвэл цахим хуудсаараа ч бас ийнхүү дургүйцлээ илэрхийлэх болжээ. 

    Уг нь өнгөрсөн онд Х.Тэмүүжинг огцруулах асуудал яригдаж байх үед түүнийг өмөөрсөн хүн нь Ерөнхийлөгч Ц.Элбэгдорж байсан. Тэрбээр нэгэн  нэвтрүүлэгт оролцох үеэрээ “Х.Тэмүүжин өнөөдөр Монголын хууль зүйн шинэчлэлийн үйл ажиллагаанд гамшиг тарьж байгаа юм байхгүй. Залуу хүн, анх удаа сайд хийх гээд ажиллаж байна. Бид нар ч алдаж байсан. Гэхдээ алдаагаа зохицуулаад, олон түмэнтэйгээ зөв харьцаад явахад ажил хийх бүрэн боломжтой. Х.Тэмүүжинг огцруулах асуудлыг өргөн барилаа гэдгийг сонсоод л би хэлж байсан. Х.Тэмүүжинг огцруулахгүй ээ. Хамгаална аа. Энэ хамгаална гэдэг нь бид хууль, шүүхийнхээ шинэчлэлийг хийе гэж байгаа юм. Зарим нь хэлдэг юм. “Х.Тэмүүжин ганцаараа хийдэг юм уу” гэж. Х.Тэмүүжин ганцаараа хийхгүй л дээ. Хууль, шүүхийн шинэчлэлийг хийе гэхэд маш олон хүний хүчин зүтгэл орж байгаа” хэмээн ярьж байсан. Тэгвэл өдгөө Х.Тэмүүжин гишүүн Ерөнхийлөгчид ингэтлээ дургүйцэх болсон шалтгаан нь юу юм бол.