Хошин урлагийн нэрт төлөөлөгч Латиф агсны хүү Байзада аавынхаа нэрээр сан байгуулж, хааяахан хандивын тоглолт зохион байгуулдаг болсон. Гэвч тэрбээр  саяхнаас нэгэн таагүй мэдээлэлд холбогдлоо. Тархины саажилттай хэмээн оношлогдож, АНУ-д эмчилгээ хийлгэвэл 90 хувь хүртэл эдгэрэх бүрэн боломжтой хэмээн хандивын аян өрнүүлж байсан О.Сувд охины хандивын тоглолтын орлогыг Л.Байзада луйварджээ.

Тодруулбал өнгөрсөн сарын 25-ны өдөр тархины саажилттай гэж оношлогдсон нэг ой зургаахан сартай О.Сувд охинд туслах "Зүрхний бяцхан сувд" хандивын тоглолтыг зохион байгуулсан байна. Гэтэл уг ажлыг хариуцан хийсэн Л.Байзада өнөөдрийг хүртэл тоглолтын орлогыг өгөөгүй  бөгөөд бүтэн сарын дараа билет чинь бүрэн зарагдаагүй маш олон ширхэг билет буцаагдсан хэмээн уулзахаас татгалзжээ. Гэтэл тухайн тоглолтыг үзсэн хүмүүсийн хэлж буйгаар  тоглолтын танхим дүүрэн шахуу үзсэн бөгөөд билет буцаагдсан зүйл ажиглагдаагүй хэмээн ярьжээ. 

О.Сувд охины ээж энэ талаар "Хүлээсэн өдөр ирсэн ч их санасан газар 9 шөнө хоосон гэгчийн үлгэр боллоо. 1000 билет борлуулна гэж тоглолт болохоос нэг сарын өмнө авчихаад тоглолт дуусаад бараг сар болох гэж байхад 700-800 билет буцсан гэж хэлэх юм. Тоглолтын өдөр санаа зовоод лавлахад "Билетний буцаалт байхгүй, санаа зоволтгүй, чиний данс руу билетний мөнгө сар сар гээд л орно" гээд байлаа. Гэтэл өнөөдрийг хүртэл нэг ч төгрөг орсонгүй. Уулзана гэчихээд шалтаг хэлж зугатаад байхаар нь арга ядаад тулгаад асуусан чинь ингэж хариулж байх юм. Үүнийг хамтарч ажилласан гэх үү. Хүний мөс чанарыг таних талаар сайхан сургамж өгсөн ЛАТИФ сангийн тэргүүн дуучин Л.БАЙЗАДА-даа баярлалаа. 40 нас хүрэхдээ ийм эр хүн байдаг тухай ч зүүдлээгүй явсан надад хэзээ ч мартагдашгүй том сургамж боллоо. Хүний сайхан үгэнд хууртжээ. "Охины чинь буян заяа түшнэ, найз нь тусална, чадна. Тоглолтын дараа л найзыгаа сэтгэлээрээ шагнахад л болно. Би бас охинтой хүн... гэх зэрэг олон сайхан үгс агаартаа л үлдэх шив дээ. Гэрээ хийгээгүй болохоор хэрэгт унахгүй гээд бодож байгаа болов уу. Сайхан үг шиг байдаг эрчүүд олон ч, эсрэг байдаг бас цөөнгүй ажээ. Дандаа сайхантай нь учирсан би азтай байжээ. Өнөөдөр уулзаж тооцоогоо эцэслэх сүүлийн өдөр гэж өчигдөрхөн надад мессэж бичиж байснаа өдөржин хотод түүнийг ярьж, хэзээ уулзахыг нь хүлээж хүлээж яг цагийн өмнө авсан хариу маань энэ. Надтай тооцоо нийлээгүй байж дахиад өөр саажилттай хүүгийн тоглолт хийнэ гээд постерийг нь гаргачихаад share хийлгээд явж байна лээ. Энэ тэгээд ариун явдал уу? Өрөөлд найдаж, ихийг мөрөөдсөн нь миний буруу юу? Өөрийнхөөрөө л шүрээрээ утасны дугаараа нэхээд явсан бол илүү дээр байх байж дээ. Хэн нэгэнд итгэж хий горьдохгүй, хүнд хар буруу санахгүй явах байжээ" хэмээн бичжээ.

Тэгвэл  Л.Байзада өнгөрсөн жил ч мөн хандивын тоглолтын орлогын асуудалд холбогдож улмаар шүүх цагдаагийн байгууллагад хандах дээрээ тулж байжээ. Гэвч Л.Байзада хохирогчдыг нэр төрд халдсан хэмээн их хэмжээний мөнгө нэхэмжилнэ гэснээр уг хэрэг дууссан талаар эх сурвалжууд хэлж байна.