Уран баримлын наадмыг хоёр дахь жилдээ зохион байгуулахаар болсон байна. Энэ талаарУлаанбаатар хотын Захирагчийн ажлын албаны Тохижилт хог хаягдлын удирдлагын хэлтсийн Тохижилт хариуцсан ахлах мэргэжилтэн О.Оджаргалаас тодрууллаа. 

-Хоёр дахь жилдээ зохион байгуулагдах гэж байгаа уран баримлын наадмын mалаар тодруулаач?

-Улаанбаатар хотын Захираг­чийн ажлын алба, Нийслэлийн Ерөнхий төлөв­лөгөөний газар, Нийслэлийн аялал жуулчлалын газар хамтран “Улаанбаатар –Уран  баримал” наадмыг зохион байгуулах гэж байна. “Найрсаг Улаанбаатар” хөтөлбөрийн хүрээнд зохион байгуулагдаж буй энэхүү наадам нь нийслэлд хот чимэглэлийн уран баримал, шинэлэг загвар, шийдэл бүхий мэдээллийн байгууламжийг нэмэгдүүлэх зорилготой. Мөн нийслэлийн иргэдийн ая тухтай амьдрах нөхцлийг бүрдүүлэх, Монголын өв соёл, ёс заншлийг хүүхэд залууст сургах, найрсаг харилцаа, хандлагыг төлөвшүүлэхэд чухал үүрэгтэй.  Хотын Ерөнхий менежерийн дэргэдэх гадна зар сурталчилгааны зөвлөл, Монголын урчуудын эвлэл, Монголын хүүхдийн ордон, төр болон хувийн хэвшлийн байгууллагууд тус наадамд нэгдэн оролцоно. Өнгөрсөн онд тус уралдааныг зохион байгуулахдаа баримлыг ямар ч материал хийж болно гээд материалаар заагаагүй. Ингэснээр зарим материалаар баримал хийхэд хэврэг, зарим нь бат бөх болдог зэрэг асуудал гарсан. Тиймээс энэ онд бид зөвхөн чулуу, мод, шингэн давирхай ашиглаж хийсэн хатууруулсан биет материал буюу хуванцар ашиглан хийсэн шилдэг 15 баримлыг шалгаруулъя гэж байгаа. 

-Уралдаанаас шалгарсан бү­тээлүүдийг өнгөрсөн жил Үндэсний цэцэрлэгт хүрээлэнд байршуулж бай­сан. Энэ жилийн бүтээлүүдийг хаан байршуулах вэ?

-Өнгөрсөн жилийн урал­даа­наас шалгарсан шилдэг бүтээ­лүүдийг зөвхөн Үндэсний цэцэр­лэгт хүрээлэнд байршуулсан бол энэ жил нэр заасан 11 гу­дамж, зам талбайд байршуу­лахаар болсон. Тухайлбал, Ард кино театрын өмнөх талбай, Бөхийн өргөөний урд, Монгол банкны замын эсрэг талын газрын маргаантай байгаа байршил, 120 мянгатын автобусны буудлын ард байршуулна. Мөн Сэлбэ голын урсацыг нэмэгдүүлэх төслийн хүрээнд тохижуулсан хэсэг, Баруун дөрвөн замд байрлах Хайрын төгөл, Ард Аюушийн өргөн чөлөө, Төв цэнгэлдэх хүрээлэн зэрэг байршлуудад байршуулахаар төлөвлөж бай­гаа юм. Энэ мэтээр ажлуудыг үе шаттайгаар зохион байгуулсны дараагаар чөлөөт уран бүтээлчдийг шагнаж урамшуулах ажлыг хийнэ.

-Баримлыг хийх тодорхой хэлбэр зааж байгаа юу. Шалгаруулалтыг шүүх багийг бүрдүүлсэн үү?

-Бодит биелэлээ олох хэлбэр дүрстэй баримал дээр өндрийг нь нэг метрээс багагүй байна гэдэг шаардлага тавьж байгаа. Харин томд нь 3.5 метрээс өндөргүй байхаар төлөвлөж байгаа. Ингэхдээ чанарын шаардлага хангасан олон жилийн эдэлгээтэй байх шаардлагыг тавина. Түүнчлэн байршуулах 11 байршилд тохирсон загвартай баримал хийхийг санал болгож байгаа. Тийм ч учраас байршуулах гудамжны нэршлүүдийг гар­га­сан юм. Харин хийсэн баримлыг мэргэжлийн хүмүү­сээс бүрдсэн шүүгчдийн зөвлөл шалгаруулна. 

-Өнгөрсөн онд тус уралдаанд нэлээд олон хүн оролцож байсан. Энэ жилийн уралдаанд оролцох хүмүүсийн сонирхол ямар байгаа бол?

-Өнгөрсөн оны уралдаанд 60 орчим уран бүтээлч оролцож байсан. Энэ онд үүнээс олон хүн оролцох байх гэж бодож байгаа.