Улс төрч гэхээсээ нийтлэлч, зохиолч хэмээн нэрлүүлэх дуртай нэгэн хүн бол Баабар буюу Бат-Эрдэнийн Батбаяр юм. 40-ээс дээш насныхан Б.Батбаярыг ардчилалд ямар үнэ цэнэтэйгээр оролцсон, Ардчилсан хөдөлгөөнийг хэрхэн удирдаж байсан, “Хаан нүцгэн байна” хэмээх илтгэл  тавьж, коммунист засаглалыг хэрхэн шүүмжилж байсныг сайн мэднэ.

Харин залуу үе түүнийг Баабар нэртэй нийтлэлчээр нь сайн мэдэх болов уу. Тэгвэл түүнд нийтлэлчээс гадна нэг “мундаг чадвар” бий. Тэр нь улс төрийн “пи-ар” хийх чадвар юм. Бараг л Монголдоо эхний хэдэд багтах хэмжээний “пиарчин” гэж түүнийг үнэлдэг юм билээ. Үнэлэхээс ч аргагүй. Түүний хийсэн олон “пи-ар”-ын ачаар Ардчилсан нам, нэр бүхий улс төрчид амжилт олж, одоо ч төрийн өндөр сэнтийд сууж байгаа. Тиймээс ч Баабарын пи-ар хийх аргыг АН-ынхан битүүхэндээ шагшин магтаж, саашаан дэмждэг б

Гэвч “цаг цагаараа байдаггүй, цахилдага хөхөөрөө байдаггүй” гэдэг шиг Баабарын шилдэг аргууд хуучирч, хийсэн пи-арууд нь танигдаж эхэллээ.

Түүнд пи-арын “маш том” баг бий. Тухайлбал, Баабар.мн-ийн нийтлэлчид, “Непко” Хэвлэлийн газрынх нь эх бэлтгэгчид, дизайнеруудаас бүрдсэн “чадварлаг баг”-тай. Тэдэндээ чиглэл өгч  “хэрээг хун болгох, тагтааг шонхор болгох, болжморыг арслан болгох, цагааныг хар болгож” сонгогчидод  “итгүүлэх” бүхий л ажлыг “өндөр түвшин”-д гарамгай гүйцэтгэнэ. Мэдээж баабар.мн-д ажиллаж, Баабар гуайгаас цалин авч л байгаа хойно эзэндээ “нохой мэт зүтгэх” нь ойлгомжтой.

Ингээд шилдэг бичээчдийн гараас “хэрээг хун” болгох уран бүтээлүүд хөвөрч эхэлдэг байх юм. Гэхдээ үүнийг Баабарын шилдэг пи-ар гэхгүй л дээ. Харин “өөрөөр нь өөрийг нь бариулах” гэх Оросын улс төрчид ихээр ашигладаг нэг аргыг манай Баабар “ах” маш сайн ашиглана. Энэ арга одоо хоцрогдсон хэдий ч Монголд бол амжилт олоод л байгаа юм.

Тухайлбал, Баабар гуай энэ удаагийн сонгуульд Ч.Сайханбилэг, Н.Батбаяр, дуучин Нара нарыг “сойж” оролцож байгаа гэх.  “Сойж” гэдэг нь тэдний сонгуулийн  пи-арыг хийж байна гэсэн үг.

Яагаад энэ гурав гэж хэмээн асууж магадгүй. Мэдээж энэ гуравт онцгойлон үйлчлэх учир шалтгаан түүнд бий бололтой.

Тэгвэл Ч.Сайханбилэгтэй улс төрийн том тохироо хийсэн болов уу гэж харагдаад байгаа. Харин фортун Н.Батбаярын хувьд  Эдийн засгийн хөгжлийн сайд байхдаа хөгжлийн банкаар дамжуулан Баабарын нийтлэлчидэд зориулан 100 орчим сая төгрөг олгосон байдаг. Тэгвэл Нарад яагаад туслах болов гэвэл намын нөхөртэйгээ муудалцсан явдлыг санах хэрэгтэй. Тодруулбал, тэрээр УИХ-ын гишүүн, ХАХНХ-ын сайд С.Эрдэнэтэй тун таарамжгүй харилцаатай байгаа. Тэгэхээр С.Эрдэнэтэй нэг тойрогт өрсөлдөх Нараг дэмжсээр С.Эрдэнийг дэмжигчидэд “саад хийх”, улмаар түүнийг сонгуулахгүй байхын төлөө ажиллаж байгаа гэж ойлгогдохоор байна.

Үүнийг баталгаа гэмээр нэг жишээг энд дурьдая.  Саяхан болсон олны  анхаарал татсан асуудал л даа. Ганбууш буюу Ган-Од цэнхэр пиджак өмсч гарч ирээд л Нараг “доош нь хий”-сэн бичлэгийг та санаж байгаа байх. Тэгсэн хүмүүс Ган-Одыг С.Эрдэнэ хөлслөөд ийм айхтар бичлэг хийж, олон нийтийн сүлжээгээр цацлаа гээд л таамаглаж, шүүмжлээд байгаа.

Үнэндээ  энэ чинь “өөрөөр нь өөрийг нь бариулах” өнөөх Баабарын пиарчидын багийн хийсэн аргачлал гэдгийг анзаарах сөхөөтэй хүн алга.  Энгийнээр хэлбэл С.Эрдэнэ Ганбуушыг хөлсөлж, Нараг муулуулж байгаа мэтээр харуулж байгаа боловч цаана нь Нарагийн нэр хүнд өсч, Баабар ах зорьсноо биелүүлж байна л гэсэн үг юм.

С.Эрдэнэ улс төрд 20 гаруй жил хүч үзэж олон сонгуулийн ард гарсан туршлагатай  улс төрчийн хувьд өрөвдүүлэх тактик ямар байдгийг мэдэхийн дээдээр мэдэж байгаа атлаа Нараг Ганбууштай холбож элдэв бичлэг хийж өөртөө  оноо алдах тэнэг биш гэдэг нь хэн бүхэнд ойлгомжтой. Гэтэл С.Эрдэнийг энэ бүгдийг зохион байгуулсан мэтээр харагдуулах гэсэн Баабар гуайн атгаг санаа л энд  цухалзаж байгаа мэт.

Магадгүй тун удахгүй үүнтэй төстэй аргыг Баянзүрх дүүрэгт  Ч.Сайханбилэг, Архангай аймагт  Н.Батбаяр нар дээр ч ашиглавал нэг их гайхах хэрэгүй биз.

Магадгүй  Баянзүрх дүүргийн Засаг дарга асан Б.Батзоригтой холбоотой сенсаци дэлгэгдэнэ. Цаад зорилго нь Ч.Сайханбилэгийг дэмжүүлэх. Баабар бол гэрээнд заасан ажлаа л гүйцэтгэж, өөрийн пи-араа л хийж байгаа нь тэр.

Мөн Архангай аймгийн Иргэдийн хурлын төлөөлөгч Ё.Баатарбилэгийг харлуулах ажиллагаа ч идэвхтэй явагдах байх. Үүнийг нь мэдээж, Баабар тэргүүтнүүд гардан зохион байгуулна.

Баабар үүгээр зогсохгүй олон дагагчидтай твитерчид болон томоохон фэйсвүүк пэйж хуудсуудыг энэ зорилгодоо ашиглаж байгааг учир мэдэх хүмүүс хэдийнэ харсан байна билээ. Баабарын коммандаар “уяатай ноход” мэт  түүний “цэргүүд” хэнийг харлуулж, хэнийг цагааруулж мэдэх “пиар”-ын гэх ажилдаа ийнхүү хэдийнэ оржээ.

Баабар.мн-ний нийтлэлч Батбаяр гэх энэ эрхэм өөрийн фэйсбүүк болон твиттеэрээрээ улаан цайм Нараг дэмжих байгаа нь үүний илэрхийлэл гэж ойлгож болох.

А.Галт

Tashuur.mn