Нийслэлийн  хойморт орших Нарангийн энгэр бараг тэр чигээрээ булш. Айл өрхийн хаяа дэрлээд, зарим айлууд нь бүр булшнуудын дунд орчихсон аж төрж буй. Хэдэн жилийн өмнө тэдгээр айлуудыг нүүлгэх арга хэмжээ авсан ч одоо бараг бахь байдгаараа л байна. Тэнд сүүлийн жилүүдэд шөнийн цагаар очиж булш ухагчид нь хүмүүсийн гайхал, зэвүүцлийг төрүүлсээр байна. Өнгөрсөн онд  булш ухсан тохиолдол цагдаагийн байгууллагад 10 гаруй бүртгэгджээ.  Харин шинэ он гарсаар гурван удаа булш ухсан хэрэг гарсан байна. Хэргийн мөрөөр шалгаж буй ч ямар үр дүн гарах нь одоогоор бүрхэг байгаа аж.

Өнөөдөр улсын хэмжээнд нийт нас барагсдынхаа 60 гаруй хувийг урьдын адил газар ухаж   оршуулж  байна.  Жилд 6-7 мянга  гаруй хүн нас бардаг гэсэн статистик судалгаа бий. Тэдгээрийн 2 мянган орчим нь Нарангийн энгэрт  очдог ажээ. Нэг хүний цогцос оршуулахад 10-15 метр квадрат газар шаардагддаг.

Нас барагсдыг оршуулахдаа манай зарим иргэд оршуулгын хайрцагт нь тухайн хүний эдэлж хэрэглэж явсан үнэт эдлэл, бурхан тахилгын зүйлс хийдэг тул булш ухагчид  тэдгээрийг авахын тулд талийгаачдын шарилыг эрээ цээргүй хөнддөг  нь нууц биш юм. Харамсалтай нь Нарангийн энгэрт цагдаагийн хамгаалалт байдаггүй. Тиймээс энэ бүхнийг хотын захиргаанаас  яаравчлан шийдэх хэрэгтэй болжээ.

Б.Баяр

Эх сурвалж: Tumen.mn