Ерөнхий сайд Ч.Сайханбилэг  Н.Алтанхуягийн Засгийн газрын үед Эдийн засгийн хөгжлийн дэд сайдаар ажиллаж байсан О.Чулуунбатыг   Эдийн засгийн зөвлөхөөрөө томилсон юм. О.Чулуунбат  нь одоо МАХН-д  данстай.  Урьд нь МАН-ын гишүүн байсан. Тэрбээр МАХН-ыг шинээр бүртгүүлж өрх тусгаарлахад тус намын дарга Н.Энхбаярыг дагах болжээ. Солонгост эмчилгээ  хийлгэж байгаа  Н.Энхбаяр нь харин  эх орондоо ганц удаа ирээд буцахдаа  Н.Алтанхуягтай  ил ба “нууц” гэрээ байгуулж баахан бужиглуулж орхисон. Үүнээс болоод АН-ынхан Н.Алтанхуяг даргыгаа онцруулахад хүрсэн  бөгөөд  МАХН-ын  журмын нөхөр О.Чулуунбат нь ч Н.Энхбаяртаа ихээхэн дургүйцэх болжээ. Мөн намынх нь бусад  нөхөд  ч Н.Энхбаярт  таатай хандаагүй гэдэг.  Тиймээс О.Чулуунбат нь  МАХН-ын гишүүнээсээ татгалзсан ч яахав гэсэн бодол тээж яваа бололтой. Тэр энэ тухайгаа одоогоор ил гаргахыг хүсэхгүй байгаа аж. Сэтгүүлчдийн сониуч асуултанд харин тэр  хариулахдаа “Би аль нэг намд үйлчлэхгүй. Үнэнийг хэлэхэд  манай намын дарга бид хоёрын хооронд АН-тай байгуулсан 10 жилийн гэрээнээс болоод зөрчил үүссэн.  Уг гэрээг АН-ын  ҮЗХ-ны шийдвэрээр  хүчингүй болголоо.  Н.Энхбаяр яагаад бидний байр суурийг сонсолгүй ийм гэрээ хийв. Тийм эрх хэнд ч байхгүй.  Ер нь нам гэдэг чинь нэг дарга нь дуудаж авчраад хөөдөг, эсвэл үзэл бодол нийлсэнгүй гээд зоддог газар биш. Би намаас гарч болно. Гэхдээ одоогоор гарчихсан юм алга” гэсэн байна.

Б.Баяр

Эх сурвалж: Tumen.mn