Өчигдөр төрийн ордонд эхэлсэн эдийн засгийн форум шинэлэг олон асуудлыг хөндлөө. Гадаадын хөрөнгө оруулалт Монголоос дайжсан энэ үед эдийн засгийн зургаа дахь форум болж буй нь онцлог. Иймээс ч эдийн засгийн чуулганд оролцогсод яаж гадаадын хөрөнгө оруулалтыг татах вэ гэдэг дээр анхаарлаа хандуулав. Шүүмжлэгчид ч цөөнгүй байлаа. Тэд төр засгийн тогтворгүй бодлого, Үндсэн хуультай энэ бүхнийг холбон тайлбарлав. Заалнаас зарим нь төр засгийн томчууд руугаа чанга дуугаар “Та нар хэлж буй үгэндээ итгэлтэй байна уу” хэмээн асууж байв.
“Ажил хэрэгч үдийн зоог” арга хэмжээний хүрээнд М.Энхсайхан сайдын тавьсан илтгэл хүмүүсийн анхаарлыг татлаа. Тэрбээр “Супер цикл: Баян ба ядуу” сэдвээр илтгэл тавьсан бөгөөд “Богино хугацаанд эдийн засгийн өсөлтийн амжилтын нууцыг Оюу толгой төслөөс хайх хэрэгтэй. Энэ төсөл бол төрийн төсөл биш, цэвэр бизнесийн төсөл” хэмээн онцолсон юм. Гэхдээ тэр алдаатай бодлогын төлбөр болох 150 сая ам.долларын урьдчилгаа, Чалко-гоос авсан 350 сая ам.долларын зээлийг ч бас дурсав. Байгалийн баялаг бол шавхагддаг баялаг. Мөн шинжлэх ухаан технологийн нөлөөгөөр хэрэглээ нь буурч байгаа талаар М.Энхсайхан сайд илтгэлдээ дурьдсан юм.
Эдийн засгийн чуулганы салбар хуралдааны явцад төрийн ордоны “Их танхим”-д Төрийн хяналт-шалгалт, түүний эдийн засагт үзүүлэх нөлөө сэдвийн хүрээнд сүүлийн үед багагүй асуудал үүсгээд байгаа Татварын хууль болон хуулийн байгууллагынхны зүгээс бизнесийн салбарт үзүүлдэг дарамт шахалтын талаар хөндөн ярилцлаа.
АТГ-ын Мөрдөн шалгах хэлтсийн дарга Ө.Энхтөрийн хэлсэн үг чуулганд оролцогсдын сонирхолыг татав. Ө.Энхтөр хэлэхдээ жилд татварын хэргээр 300 орчим хүн шалгагдаж байгаагаас тэдгээрийн 10 хувьд эрүүгийн хэрэг үүсгэдэг гэж байв. Түүний үгийг өлгөж авсан УИХ-ын гишүүн Ц.Оюунгэрэл нарын зэрэг хүмүүс шүүхийн шинжилгээний хүрээлэнгийн шинжээч нарыг шүүмжилсэн юм. Шинжээчийг мөрдөн байцаагч томилдог. Гэтэл энэ нь цаг үеийн шаардлагыг хангаж байгаа эсэх, шинжээч нь нэхэмжлэгч болон шүүгдэгчдийн аль алинд таалагдахгүй бол яах вэ гэдэг асуудлыг хөндөв. Ө.Энхтөр дарга болон Эрдэнэбат прокурорын зүгээс бүх юм хууль дүрмийн дагуу явж буйг тайлбарлаж байсан юм. Гэвч УИХ-ын гишүүн Ц.Оюунгэрэл шинжээчдэд сэтгэл дундуур явдагаа нуугаагүй. Түүний хувьд ялангуяа олон улсын нягтлан бодох хэлээр мэргэшсэн хүн Шүүхийн шинжилгээний хүрээлэн, Татварын ерөнхий газарт байгаа эсэхэд эргэлзэж яваа ажээ. Мөн төрийн бус байгууллагын төлөөллүүд татварын хяналт шалгалт хийдэг мэргэжлийн, мэргэшсэн хүн хэрэгтэй байгааг сануулж байлаа.
Эдийн засгийн чуулга уулзалт өнөөдөр үргэлжилнэ. Ерөнхийлөгч Ц.Элбэгдорж үг хэлж, төгсгөлийн нэгдсэн хуралдаанд УИХ-ын дарга З.Энхболд илтгэл тавих ажээ.
Б.Отгонбаяр
Эх сурвалж: Tumen.mn
