Өмнөд хөрш ковидоос үүдсэн хил боомтын хязгаарлалтаа хэсэгтээ л суллах төлөвгүй байгаагийн зэрэгцээ хойд хөрш болон Украины хооронд үргэлжилж буй дайн тулаан ч төгсөх янзгүй байна. Ерөнхийдөө гадаад зах зээлээс 100 хувь шахам хамаарал бүхий эдийн засагтай манай улсын тухайд энэ бол тун таагүй дүр зураг л даа. Гэхдээ тэгээд дэлхий нийтээрээ том эрсдэлүүдтэй нүүр тулж буй учраас бид эндээ бачуураад байлгүй, төр засгаас оновчтой бодлого шийдвэр гаргахад л анхаарах ёстой юм. Тэрдундаа хэрэгжүүлэгч, тохируулагч агентлагууд болоод салбарын асуудал эрхэлсэн яамдуудыг удирдаж ажилладагийн хувьд Засгийн газрын зүгээс ийм цаг үед гүйцэтгэх үүрэг роль их байх ёстой л доо.

Гэвч энэ оны эхний улирлын нөхцөл байдалд тулгуурлаад аваад үзэхэд, БНХАУ-ын ковидын нөхцөлөөс хамаарсан хил гаалийн хүндрэл бэрхшээл ужиграх нь тов тодорхой байхад л Л.Оюун-Эрдэнийн удирдсан Засгийн газар “Шинэ сэргэлт”-ийн бодлого гэх макро түвшний асуудлаа ярьсаар цаг хугацааг өнгөрөөж байв. Хэдийгээр урт хугацааны хөгжлийн бодлогын асуудлаа бид ярих ёстой ч, тулсан нөхцөл байдалд богино, дунд хугацааны бодлого төлөвлөлт тун чухаг гэдгийг эдийн засагчид хэлээд байсан ч, Засгийн тэргүүн өөрийнхөөрөө зүтгэж, бүр Эдийн засгийн чуулган гэх багагүй төсөв мөнгө шаардсан арга хэмжээ зохион байгуулж, түүгээрээ өнөөх Шинэ сэргэлтийн бодлогоо хэлэлцэв.

Хамгийн гол нь хэчнээн хэлэлцлээ гээд, эдийн засгийн өнөөгийн нөхцөл байдалд тохирсон, цаг үеэ мэдэрсэн арга хэмжээг төр засгаас авч хэрэгжүүлж чадаагүй учраас ирэх саруудад манай эдийн засгийг амаргүй бэрхшээлүүдийг угтаж буй талаар олон улсын байгууллагууд хэдийнэ үг унагаж эхлээд байна.

Монгол Улсын Ерөнхий сайд Л.Оюун-Эрдэнэ эдийн засгийг сэргээх Шинэ сэргэлтийн бодлогын талаарх албан ёсны байр сууриа илэрхийлэхдээ “Хөгжлийг хязгаарлагч хүчин зүйлсийг хамтдаа шийдвэрлэж чадахгүйгээр ямар ч сайхан зорилт дэвшүүлсэн цаасан дээр царцаж үлдэх эрсдэлтэй юм. Тиймээс эдийн засгийн тусгаар тогтнол, бие даасан байдлыг ханган хэрэгжүүлэх, шинэ зуунаа эхлүүлэх зорилго ч, “Алсын хараа-2050” хөгжлийн бодлого ч энэхүү зургаан асуудалтай ус, агаар, хөрс мэт шүтэн барилдлагатай” гэхчлэн гоё үгс хэлж байсан.

Тэгвэл үнэн хэрэгтээ мах, гурилын үнэтэй зууралдаад байх бус эдийн засгийн өнөөгийн төлөв байдалдаа зөв үнэлэлт, дүгнэлт хийж, хөрш орнуудтай дипломат яриа хэлцлийг амжилттай хийх, овор ихтэй бус онгоцоор тээвэрлэж болох алтны экспорт зэрэг валют татах урсгалууддаа анхаарах зэрэг асуудлууд манай тухайд ус, агаар мэт чухаг байгааг Ерөнхий сайд мэдэж байгаа болов уу.

Эдийн засагчдын зүгээс Засгийн газарт чиглэсэн анхаарал татахуйц зөвлөгөө сэлтийг зөндөө л өгч харагдах юм. Тухайлбал, эдийн засагч Ч.Отгочулуу хэвлэлд өгсөн ярилцлагадаа “2022 оныхоо төсвийн хуульд эдийн засгийнхаа үндсэн асуудлын шийдлийг оруулж чадаагүй байж, 2050 онд л цэнгэлийн манлайд хүргэнэ гэж яриад байгаа нь сонин. Шинэ сэргэлт гэж ярихаасаа өмнө энэ хурдтай унаж байгаа эдийн засгаа тогтворжуулах хэрэгтэй. Эдийн засаг эрүүл, тамир тэнхээтэй байх ёстой. Төсөв өндөр алдагдалтай, инфляц өндөртэй, гаднаас өр зээл авдаг энэ байдал чинь Шинэ сэргэлт битгий хэл улам уруудах, бодит байдал дээрээ Шинэ уналтын бодлого болон хувирчээ. Тэгээд ч тэр бодлогын хүрээнд хийх ажлуудынх нь хөрөнгө оруулалтын дүнг жагсаахад 120 их наяд төгрөг болж байсан. Улсын төсвөөс гарах ямар ч боломжгүй. Хувийн хэвшилд ч үүнийг хийх чадавхтай компани бараг үлдээгүй. Жаахан томорчихсон аж ахуйн нэгжүүд рүүгээ шалгалт оруулдаг, элдвээр цоллодог. Гэтэл Үндэсний үйлдвэрлэгч том компаниуд байхгүй бол шинэ сэргэлт байхгүй гэдгээ санах хэрэгтэй” хэмээн ярьсан байна билээ. Өөр бусад эдийн засагчид ч Засгийн газрын үйл ажиллагаанд шүүмжтэй хандаж буй бөгөөд том дүнтэй, том бодлого ярьж, хурал хуй хийж төсвийн мөнгө үрэхийн оронд бодитой зүйл хийхийг л Ерөнхий сайдаас шаардаж буй юм.

Tumen.mn