Өмнийн говийн хар алт Монголчуудыг цэнгэлийн манлайд хүргэнэ хэмээн ухуулаад удаж байна. Гэвч одоохондоо тэр их жаргал цэнгэлийн сэжүүрийг Монголчууд амсаагүй байна. Гэхдээ буяныг нь эдлэж байгаа цөөхөн хүн бий. Лав л уул уурхайгаас олсон ашгаас иргэдэд хүртээж буй 21 мянган төгрөгний буянаар ажилгүй залуучууд ажилтай болж, гэр хорооллын гудамжны буланд орой үдэш шилтэй цэнхэрийг мулталж, шүлсээ хаях эзэнтэй болсон. Улс орон даяар эрүүлжүүлэхүүд ч өндөр ачаалалтай ажиллаж, архины үйлдвэрүүдийн ашиг орлого огцом нэмэгдэж байгааг дурдахгүй өнгөрч болохгүй.
“Ажнай” Д.Бат-Эрдэнэ гэх амны хишигтэн 2004-2008 онд парламентад суухдаа банкны зээлээр хоёр машин худалдаж авч анх нүүрсний бизнест хүч үзэж байсан бол өнөөдөр дэлхий даахгүй баян болсон. Жилдээ 60 тэрбумын ашиг олдог түүний мэдэлд байдаг нүүрсний ордын лицензүүд нь л гэхэд тоогоо алдсан. Зөвхөн ганц лиценз нь доод тал нь 20 сая ам.доллар халааслах “Ажнай”-н Д.Бат-Эрдэнэ бороо шиг шаагих их мөнгөө багтааж шингээж ядан Нүхтийн аманд Германчуудаар тансаг зэрэглэлийн байшин бариулжээ.
Эрэг шурагнаас эхлээд тоосго, цемент гээд бүх л зүйлийг нь дэлхийд чанараараа гайхагддаг орнуудаас авчруулсан төдийгүй алив ажлыг яс чанартай хийдэг Герман мэргэжилтнүүдийг урьж барилга угсралтыг нь хийлгэж байгаа “Ажнай”-н Д.Бат-Эрдэнийн тансаг сууц, сарын 108 мянган төгрөгийн цалинтай жирийн иргэдийн төдийгүй, хулгай худлын аргаар тэрбумаар нь халаасалдаг Нүхтийн баячуудын хорхойг гозгонуулж байгаа юм.
shudarga.mn
