Гадаад харилцааны сайдаар намын томилгоо дагаж “Мөнхийн үсэг”-ийн босс Б.Батцэцэг томилогдон очсон бол Гадаад харилцааны дэд сайд Б.Мөнхжин, Төрийн нарийн бичгийн дарга Н.Анхбаяр нар томилогдоод байгаа. Гэтэл намын томилгоо авсан нөхдөөс дэд сайд Б.Мөнхжин “0240 УНҮ” дугаартай албаны автомашинаар “Амур” зочид буудалд хүргүүлэн, архидан согтуурхаж, эмэгтэйчүүд зөөж байгаа бичлэг цахим орчинд цацагдсан нь дуулиан тарьж байна. Тиймээс дэд сайд Б.Мөнхжинг эргүүлэн татах эсэх асуудлыг МАН-ын Удирдах зөвлөл дээр ярьж байгааг эх сурвалж дуулгалаа. Мөн өнгөрөгч долоо хоногийн ЗГ-ын хуралдаанаар ерөнхий сайд Л.Оюун-Эрдэнэ тус асуудалд хариуцлага тооцохыг ЗГХЭГ-ын дарга Ц.Нямдоржид даалгасан гэнэ.
Энэ бол том алдаа учраас Б.Мөнхжинг огцруулах нь ойлгомжтой болж байна. Аливаа улсын Гадаад харилцааны яам бол эрэмбээрээ Засгийн газарт Ерөнхий сайдын дараа жагсдаг. Нөгөө талаар Монгол Улсын нүүр царай болж явдаг хамгийн чухал статус учраас зөвхөн албан тушаалаас буулгаад зогсохгүй хариуцлага тооцох ёстой гэдгийг ч албаны хүмүүс хэлж байна.
Ерөөсөө намын томилгоогоор крандуулж ирсэн нэг дэд сайд шөнө дөлөөр албаны машинаар архидан согтуурч, охид хүүхнүүд зөөн танхайрч байгаа нь төрийн албан тушаалтны ёс зүй төдийгүй Монгол Улсын нэр хүндийн асуудал болоод байна. Мөнхүү Улсын онцгой комиссоос тогтоосон шөнийн 23 цагаас өглөөний 06 цаг хүртэл хөл хорио тогтоочихсон байх үед албаны автомашинаар чөлөөтэй зөрчих төдийгүй архидан согтуурч байгааг юу гэж үзэх вэ.
Болсон явдлыг тодруулбал Гадаад харилцааны дэд сайд гадны дарга нартайгаа 23 тооны охид эмэгтэйчүүдтэй согтуурхаж, баар цэнгэний газар, зочид буудлуудаар явсан. Дипломат тээврийн хэрэгсэлтэй зочид буудал руу согтуу хүүхнүүдийг тээвэрлэж, олон цагаар зочид буудлын гадаа хүлээж байгаад дарга нараа аваад явсан гэдэг бол бас л ноцтой асуудал. Тэд хөл хорио зөрчин ийнхүү дураараа аашилж байхад замын цагдаа нар тэдэнд ёсолж өнгөрүүлэн хөдөлгөөнд оролцуулж байсан нь ч бас асуудал юм.
Нэгдүгээрт, төрийн өндөр дээд албан тушаалтан хөл хорионы цагаар архидан согтуурсан, хоёрдугаарт албаны автомашинаар зөвшөөрөлгүй цагт зорчсон. Гуравдугаарт олон тооны охид бүсгүйчүүдийг согтууруулан зөөвөрлөсөн гээд олон зүйл бий. Хамгийн гол нь гадаад харилцаа гэх Монгол Улсын нүүр царай болсон яамны дэд сайд ийнхүү байж болзошгүй алдаа гаргасан нь ноцтой зүйл. Үүний цаана ямар хүмүүс хөл хорионы дэглэм зөрчин “Амур” зочид буудалд байв гээд шалгах ёстойг ч дуулгаж байна.
Tumen.mn
