“Монос” группын эмийн сангуудаас эм авч хэрэглэсэн хүүхдүүд  хордсон тохиолдол  жил хүрэхгүй хугацаанд хоёр удаа гараад байгаа. Анх найман сар гаруйн өмнө тус компанийн нийлүүлсэн фенобарбитал гэдэг эмэнд  16  хүүхэд  хордсон. Өнөөдөр тэдгээр хүүхдүүдийн биеийн байдал тааруухан байна. Хордолтоос болоод нэг хүүхэд нь саажилттай болжээ.  Мөн хоёр нь тархины усжилттай болоод байна. Дараагийн хоёр нь элэгний өөрчлөлттэй  болж. Хордсон хүүхдүүдийн шинжилгээний дүн үндсэндээ ойролцоо түвшинд гарч байгаа бөгөөд илэрч буй шинж тэмдэгүүд нь ч адилхан аж. Цаашдаа бас ямар өөрчлөлт гарахыг таах аргагүй. Нарийвчилсан шинжилгээг Монголдоо  хийх боломжгүй гэж байна.

Ийм хүнд нөхцөлд  эрүүл мэндээрээ хохирсон хүүхдүүдийн эцэг эхчүүд “Монос”-ын эзэн, УИХ-ын гишүүн Л.Эрдэнэчимэгтэй  саяхан уулзжээ.  Хэвлэл мэдээллийн ажилтнуудаас “нууцалж”  зохион байгуулсан  тэдний  уулзалтын үеэр нэгэн хачирхалтай зүйл яригдсан байна.  Л.Эрдэнэчимэг гишүүн урьд нь хэвлэл мэдээллийн хэрэгслээр “Эмэнд хордсон тэдгээр хохирогч  хүүхдүүдийг би бүх насаар нь эмчлэх гэрээ хийсэн” хэмээн мэдэгдсэн байлаа. Гэтэл энэхүү  амлалтаасаа  тэр ухарчээ. Үнэн чанартаа тийм гэрээ хийсэн нь ч ор тас худлаа байв.  Эцэг эхчүүд түүний уг мэдэгдлийг сонсоод их л баяртай явцгааж байж.  Хүн ер нь зовлон туулж, цөхрөөд ирэхийн алдад хэн нэгний “гоё” үгэнд сэтгэл уярахдаа “Энэ намайг мэхэлж байна” гэж ер боддоггүй бололтой. Тиймээс ч “Монос”-ын худалдаалж байсан фенобарбитал эмийг хэрэглэн эрэмдэг зэрэмдэг болсон хүүхдүүдийн эцэг эхчүүд Л.Эрдэнэчимэгт ихээхэн найдаж байжээ. Гэтэл тэр “Нууц” уулзалтынхаа үеэр “Би балмагдахдаа тэгээд хэлчихсэн юм” гэсэн байна. Харин  цаашдаа хүүхдүүдийн  эрүүл мэндийн талаар санаа тавих бололтой.

Б.Баяр 

Эх сурвалж: Tumen.mn