Ирэх оноос бид нэгэн шинэ хэвшилд суралцах нь. Тодруулбал, өдөр тутмын худалдан авалтынхаа баримтыг цуглуулах.Таны цуглуулсан баримт эргээд танд мөнгө олж өгөх аж. Бас сугалаанд оролцоно.
Иргэдэд хүрч буй татварын үр өгөөжийг илүү нэмэгдүүлэх зорилго бүхий НӨАТ-ын шинэчилсэн найруулга ирэх оноос хэрэгжиж эхэлнэ. Энэ хүрээнд иргэд худалдан авсан тухайн барааныхаа НӨАТ-ын 20 хувийг эргүүлэн өөртөө авах эрх эдлэх юм.
Олон баримт цуглуулж, түүнийгээ хаяж гээлгүй хадгална гэдэг тийм ч амаргүй. ТЕГ-аас мэдээлж буйгаар ирэх оноос аж ахуйн нэгж байгууллагууд батлагдсан стандарт бүхий баримт ашиглаж эхэлнэ. Эхний жилдээ ААН-үүдийн 40 орчим хувь нь ийм төрлийн баримтаар үйлчлэх боломж нээгдэх аж. Харин иргэд ТЕГ-аас урьдчилан мэдэгдэх бүртгэлийн цахим хуудсанд өөрийн мэдээллээ оруулна. Үүнийхээ дараа баримтан дээрх кодоо шивээд явах аж.
Өөрөөр хэлбэл, та баримтаа шивээд, хичнээн төгрөг буцаан авахаар байгаагаа хянаад явна гэсэн үг.
Цахим хэлбэрээр бүртгүүлж, баримтынхаа кодыг шивэх нь танд хэцүү санагдаж байж магад. Гэхдээ онлайн орчин ашигладаг хэн бүхэнд энэ нэг их асуудал болохгүй гэж тооцоолж байгаа. Мэдээж гэр бүлийн гишүүн бүр баримтаа тус тусдаа шивэх нь зарим талаас илүүц. Үүнийг гэр бүлийн аль нэг гишүүн хариуцан, шивж болох бөгөөд Олон улсад энэ жишиг хамгийн түгээмэл хэрэглэгддэг. Мөн гар утсандаа аппликэйшн байдлаар суулгуулах боломжийг ч албаныхан судалж байгаагаа дуулгасан.
Иргэд мөнгөө дараа оны нэгдүгээр сарын 31-ний өдрийн дотор авна. Гэхдээ аль нэг банкин дээр очиж, урт дараалал үүсгэх шаардлагагүй. ТЕГ-аас иргэдийн дансанд дээрх хугацаанд багтан мөнгийг нь байршуулах аж. Урьдчилсан тооцооллоор нэг иргэн сард 34 мянган төгрөг авах боломжтой. Тэгэхээр гэр бүлийн гишүүд тухайн жилийнхээ худалдан авалтын тодорхой мөнгөн дүнг дараа оны эхээр нийлмэл байдлаар гар дээр авах нь. Энэ нь өрхийн санхүүг дэмжих, татварыг өгөөжийг шууд гар дээрээ авах боломжийг нээж буйгаараа онцлогтой.
Татвар төлөх шударга тогтолцоог бүрдүүлнэ
НӨАТ төлөх босго /50 сая/ хүрээгүй газруудаар үйлчлүүлсэн тохиолдолд танд зөвхөн сугалаанд оролцох эрх бүхий өөр төрлийн баримт өгөх аж. Хамгийн гол нь иргэд худалдан авалтынхаа баримтыг ТЕГ-ын хяналт бүхий онлайн хуудсанд шивж, нэгдсэн мэдээлийн санд оруулснаар эргээд татвар хянах тогтолцоог бий болгоно.
Нөгөө талаас далд эдийн засаг хумигдаж, иргэдийн худалдан авалт сэргэх үзэгдэл ажиглагддаг байна.
Иргэдийн худалдан авалт үнэн дүн, он сар өдөр, цаг, минуттайгаа баримтан дээр хэвлэгдэх тул татвар нуух тогтолцолцоо харьцангуй багасна гэж албаныхан тооцоолж байгаа. НӨАТ-ын 20 хүртлэх хувь иргэдэд очдог эл хэлбэрийг манай улсад нэвтрүүлэхийн тулд нэлээд хүч хаяж байгааг ч дуулгах хэрэгтэй болов уу?
Татвар төлөгчид рүү чиглэсэн шууд өгөөж ирэх оноос дээрх байдлаар хэрэгжих нь ээ. Тэгэхээр бид баримтаа цуглуулж, ТЕГ-аас нээх онлайн цэстэйгээ харьцаж сурах шинэ даалгавартай боллоо. Нийтийн тээвэрт ухаалаг систем нэвтэрч, дугаарын хязгаарлалт бий болж, Замын хөдөлгөөний чанга хууль хэрэгжиж эхэллээ. Бүгд үр өгөөжөө өгч байна. Шинэ зүйлд дадаж, зөв амьдралын хэвшил рүү орох нь бидний үүрэг юм.
Ж.Мядагбадам
