Өчигдөр Өргөн нэвтрүүлгийн тухай хуулийн нээлттэй хэлэлцүүлэг болсон билээ. Энэхүү хуулийн агуулга нь Монгол Улсад телевиз, радиогийн өргөн нэвтрүүлгийн хөгжлийг дэмжих, үндэсний болон олон нийтийн ашиг сонирхолд нийцсэн өргөн нэвтрүүлгийн үйлчилгээ эрхлэхтэй холбогдсон харилцааг зохицуулах, өрсөлдөөний таатай орчинг бүрдүүлэхэд чиглэгдэж байгаа аж. Тэгвэл Шударга өрсөлдөөн хэрэглэгчийн төлөө газрын дарга О.Магнай МҮОНТ-д төлбөр төлөхгүй байх уриалгыг дэмжиж байгаагаа илэрхийллээ. Тодруулбал, тэрбээр өөрийн “Твиттер” “Энэ олон телевизүүд сонгуулийн үеэр бидний тархийг угаах гэж байгуулагдсан юм шүү дээ. МҮОНТ-д төлбөр төлөхгүй байх уриалгыг дэмжиж байна” хэмээн жиргэсэн юм. Түүнчлэн Азийн наадам болж буй энэ өдрүүдэд өөрсдийн баг тамирчдынхаа тэмцээнийг үзэж чадахгүй байгаа үзэгчид МҮОНТ сар бүр хураамж авдаг хэрнээ ганц спортын тэмцээн ч шууд дамжуулдаггүй хэмээн нэлээд бухимдацгаасан юм. Харин БНСУ-д байгаа нэгэн залуу гар утсаараа спортын тэмцээн шууд дамжуулж, олны талархлыг хүлээсэн. Тиймдээ ч цахим ертөнцөд бүхэл бүтэн улс тивийн тэмцээнийг гар утсаар үзэж байхад “олон нийтийн” гэх тодотголтой, айл өрхөөс сар бүр хураамж авдаг телевиз нам жим байгааг нэлээд шүүмжилж, МҮОНТ-д төлбөр төлөхгүй байх уриалгыг дэмжихээ илэрхийлсэн юм. Б.ТУУЛ О.Магнай МҮОНТ-д төлбөр төлөхгүй байх уриалгыг дэмжлээ