Жил бүрийн есдүгээр сар эрдэнэт хүний амийг авч оддог хатуухан сар бололтой.
Хөдөлмөр аюулгүй байдлаа хангаж ажилладаггүй байдлаас үүдэн олон залуус амиа алдаж, хөдөлмөрийн чадваргүй болж байна. Энэ есдүгээр сард дөрвөн хүн барилга дээрээс унаж хорвоог орхилоо.
Баримт нэг: Есдүгээр сарын 22-ны өдөр, Баянзүрх дүүргийн 26-р хороонд барилгын осол болж нэг хүн нас барсан хэрэг гарав.
Тодруулбал, "Илсон Деволопмент" компанийн захиалгаар баригдаж байгаа "Труэ-Эл" орон сууцны 103 дугаар барилгын гадна фасад хийж байхад хамгаалалтын бүс тасарснаас 18 настай эмэгтэй С нь 13 давхраас унаж амиа алджээ. Уг орон сууцны барилгын гүйцэтгэгчээр “Зун Шин” ХХК-н ажиллаж байсан бол, туслан гүйцэтгэгчээр “Бай Лхагва” ХХК-ны ажилчид ажиллаж байжээ. Амиа алдсан С нь “Бай Лхагва коп” ХХК-ийн ажилчин байсан юм байна. “Бай Лхагва коп” ХХК нь тусгай зөвшөөрөлгүй байхад “Зуншин” ХХК гэрээ байгуулж ажиллуулжээ. Энэ компанийг өмнө нь шалгаж зөрчлөө арилгах хугацаатай албан даалгавар МХЕГ-аас өгч байсан бөгөөд МХЕГ, хотын захиргааны хамтарсан Хөдөлмөрийн аюулгүй ажиллагааны талаархи сургалтанд хамрагдаж байсан аж.
Баримт хоёр: Есдүгээр сарын 07-ны өдөр “River stone” орон сууцны барилгын гадна талын пассадны өнгөлгөөг хийж байсан 17-23 насны гурван залуугийн зогсч байсан дүүжин хавтангийн олс тасарч өндрөөс унасан. Уг ослын улмаас тэдний хоёр нь газар дээрээ нас барж нэг нь эмнэлэгт хүргэгдэх замдаа амьсгал хураасан.
Дээрх оюутнууд тус барилга дээр түр гэрээгээр ажиллаж байсан юм. НМХГ-аас барилгын үйл ажиллагааг өнгөрсөн тавдугаар сард зогсоосон ч гүйцэтгэгчээ сольж “БоБэ” компанийг ажиллуулж байжээ. Ослын гол шалтгаан нь хөдөлмөрийн аюулгүй байдлыг хангаагүйгээс үүдэлтэй гэдгийг албаны болоод бусад эх сурвалжууд хэлсэн. Өөрөөр хэлбэл, уг барилга дээр ажиллаж байгаа ажилчид хөдөлмөр хамгаалалтын багаж хэрэгслээр хангагдаагүй, тэдэнд зааварчилгаа өгөх хөдөлмөр хамгааллын инженер ч байгааагүй гэдгийг хэлж байв.
Баримт гурав: Есдүгээр сарын 23-ны өдөр Нэгдүгээр сургуулийн ойролцоо баригдаж байгаа 17,18 давхар барилгаас нэг хүн унаж бэртжээ. Тэрбээр нуруу нугасны гэмтэл аван эмнэлэгт хүргэгдсэн байна. Эх сурвалжын хэлж буйгаар тус барилгын гүйцэтгэгчээр “Зун Шин” ХХК-н ажиллаж байгаа гэв. Энэ талаар бид эргэн мэдээллэх болно.
Ийнхүү хөдөлмөр аюулгүй байдлын дүрмийг сайтар сахихаагүйгээс үүдсэн ослоос болж эрдэнэт хүний амь эрсдэж байгаа бид зүгээр хараад сууж болох уу??? Мөнгөтэй гэх тодотголтой хэдэн барилгын компаниудын толгойг илээд суудаг аа болих хэрэгтэй. Хүний аминаас илүү үнэ цэнэтэй зүйл үгүй байлтай. Бодит байдал ийм байхад мэргэжлийн хяналтын үйл ажиллагааг нь зогсоосон барилга өнөөг хүртэл баригдаж сүндэрлэсээр л байх юм. Харин амиа алдсан иргэдийн төлөө дуу хоолойгоо нэгтгэн дуугарах, барилгын компаниудаас хөдөлмөр аюулгүй байдлыг хангахгүй бол ажиллахгүй гэж шаардах ажилчид алга.
Амиа алдсан иргэдийн амийг хэнээс нэхэх вэ? Хууль сахиулагчид аа!!! Барилга дээрээс унаж хүн үхэж л байдаг гээд хэнэггүйтээд өнгөрөөгөөд байх уу. Цөөхөн монголчууд барилгаас болж олон арваараа хорвоог орхиж ар гэрийнхээ нулимсанд хутган амьдруулсаар байх нь зүйд хэрэг нийцтэй вэ. Өнгөрсөн жилийн өдийд баригдаж буй барилга дээрээс төмөр унадаг байсан бол хүн унаж алтан амиа алдаж байна. Хүний амиар барилга босгох хэрэг бий юу.
Х.Даваа
Эх сурвалж: www.dorgio.mn
