Улсын төв цирк менежментийн хувьчлалд орж "Аса" цирк хэмээх нэрийн дор уушийн газар, PC тоглоомын газар болон хувирснаас хойш, циркчидийн бэлтгэл сургуулилт хийдэг, нэг дор цугладаг ганц газар нь хуучин цирк болж хувирсан. Гэтэл "Дашчойлон" хийдийн хажууханд байрлах уг цирк энэ сарын 24-нд шатаж, гол гол тулгуур багана шатаж, 70 хувь нь ашиглах аргагүй болоод байгаа юм байна.
Тэгвэл өнөөдөр Хуучин цирк дотор залгамж халаагаа бэлдэж байсан 10 гаран багш, 64 сурагч, 200 жүжигчдийн төлөөлөл Монгол Ньюс дотор мэдээлэл хийлээ. Энэ үеэр Циркийн сургуулийн эрхлэгч Доржнамжил “Сургуулилах газаргүй шахам ч манай циркчид дэлхийд тавдугаарт жагсаж, гурав руу ч үсэрч магадгүй эгзэгтэй байгаа энэ үед хуучин цирк шатсан нь 200 гаруй циркчийн зүрхийг зүсч, цусаар уйлуулсан явдал боллоо.
Учир нь Улсын цирк үгүй болсноос хойш циркийн жүжигчид төсөв, төгрөгөөс хасагдаж, мал амьтнаа барсан ч ажил мэргэжилдээ дуртайдаа гадагш дотогш уравчихгүйхэн шиг муудсан ч гэсэн хуучин асартайгаа зууралдсаар байсан” хэмээгээд цааш нь төр засгаасаа хичээл эхэлж есэн сарын нэгэн болохоос өмнө сургуулилах байрны асуудлыг яаралтай шийдэж өгөхийг хүссэн юм.
Мөн үеэр Хуучни циркийн эрхлэгч Ю.Гэрэлбаатараас тодруулга авлаа.
- Хуучин циркийн байр шатаж, Монголын циркийн урлагийн сүүлчийн амьсгаа тасрах дээрээ тулаад байна. Энэ талаар холбогдох төр засгийн удирдлагуудад мэдэгдэж, хүсэлт хүргүүлэв үү?
- Цаашид циркийн урлаг оршин тогтнох уу, үгүй юу гэдэг дээр яригдаж байгаа учраас төр засаг ямар ч байсан болно бүтнэ хэмээн цаасан дээр буулгасан хойно л бүтэн нойртой хонох болоод байна. Норм дүрмээрээ дахиад 9 хоног хүлээж байж галын дүгнэлт гарсан хойно холбогдох албадуудад нь бичиг хүсэлтээ хүргүүлнэ.
- Техник, тоног төхөөрөмж хамаг юм үгүй боллоо гэж байна. Тэгвэл монголын циркийн урлагийн гол онцлог, морьт үзүүлбэр, амьтан сургагч, амьтан адгууснууд одоо байдаг болов уу?
- Мал амьтан байхгүй. Улсын хэмжээнд устаж үгүй болсон.
- Үлдсэн ганц цирктэйгээ ярьж үзсэн үү?
- Ганцхан тусгай байр үлдсэн болохоор Аса циркийг улсаас түрээслэх шугамаар биднийг оруулах л байх. Угаасаа өөр арга байхгүй юм чинь.
- Дашчойлон хийдээс Майдар бурхан байгуулахын тулд Хуучин циркийн газраас авахаар гэрээлсэн гэсэн. Хэдэн төгрөгөөр тохиролцсон бэ?
- Майдар бурхан барихад жаахан газар хэрэгтэй байна гээд хамтын гэрээ байгуулсан. Түүний оронд цахилгааныг чинь шийдээд өгье, сантехник, шугам сүлжээг чинь солиод өгье гэсэн. Сүүлийн гучаад жил огт засвар хүрээгүй, засвар хийх хөрөнгө мөнгө бидэнд байгаагүй учир саналыг нь хүлээж авсан. Мөнгө төгрөгний юм бол байхгүй.
- Хуучин цирк хэдэн га газартай байсан бэ?
- 3000 м2 орчим газартай.
- Циркийн жүжигчин, багш сурагчдад улсаас хангамж, тусламж гэж ер нь өгдөг байв уу?
- Улсын цирк гэж байхад тэндээс хангамж, хөрөнгө мөнгийг шийдвэрлэж өгдөг байсан. Гэвч Аса цирк нэртэй болсноос хойш улсаас ямар нэгэн хангамж гэж өгөхөө больсон. Бид чинь бор зүрхээрээ л явж байгаа хүмүүс шүү дээ.
- Хуучин цирк бол хотын хамгийн төв, А зэргийн бүсэд байрладаг. Ер нь газраа зарчих, чөлөөл гэсэн хүсэлт ирж байв уу?
- Арай ч тэгэхгүй байх гэж бодоод байгаа юм. Бидэнд тийм санал ирж байсангүй. Тиймэрхүү санал бол их нууцаар л ирэх байх. Тэгээд ч уг газар нь Улсын мэдэлд байдаг, соёлын өвд бүртгэлтэй газрууд учир дурын хүн нь ирээд шууд авчихдаггүй байх. Тэгэхдээ хувь хүнд ашигтай бол тэгэх магадлал өндөр л байдаг байх. Бид нарт тэгж хардсан юм одоогоор алга байна.
- Ярилцсанд баярлалаа.
Б.Хишигдэлгэр
