Алтны төлөөх дайн далд хэлбэрээр хаа сайгүй дэгдэж байна. Сэлэнгэ аймгийн Шаамар сумын нутаг дэвсгэр, Баянголын аманд “Алтайн хүдэр” компани алт олборлохоор өнгөрөгч дөрөвдүгээр сард бууриа засчээ. Ус нутгаа хармалсан нутгийн малчид тус олборлолт явуулж байгаа газраас нүүхгүй эсэргүүцэл үзүүлсээр нэг сар орчим болжээ. Ийнхүү арга ядсан малчид тэмцэл өрнүүлж, багагүй хөл болсны эцэст төвөөс компанийн удирдлагууд ирж, нутгийн иргэдтэй тохироо хийсэн аж. Уурхайн олборлолт явуулж буй газар болон шороо зөөж байгаа замд гүрийж үлдсэн хорь орчим айлтай тохироо хийснээр Баянголын аманд эзэн суусан байна. Тухайлбал, айл тус бүрт хорин сая төгрөг атгуулсан байна.

         Ийнхүү Шаамарын малчид хорин сая төгрөгөөр газар нутгаа сэндийчүүлж эхэллээ гэсэн таагүй мэдээллийг нутаг зоныхон ирүүлсэн юм. Тэр ч бүү хэл уугуул нутгийн иргэд тус компанид ирж, машиныхаа банкыг дүүргүүлэхээс эхлээд байнгын татаас авдаг тухай ч компанийн ажилчид ярьж байна. Шаамар сумын Засаг дарга ч үе үе тус уурхайд айлчилж, багагүй хэмжээгээр хэтэвчээ зузаалдаг гэсэн албан бус мэдээллийг ч бидэнд ирүүлсэн юм. 

         Шороо тоосонд мал хүнтэйгээ сар орчим дарагдсан айлууд ийнхүү хорин сая төгрөгөөр бэлчээр усаа арилжина чинээ бодоогүй ч байж мэднэ. Гэсэн хэдий “мөнгө цагаан нүд улаан” болж, уугуул иргэд ус нутгаа хэдэн халтар төгрөгөөр өгчихдөг нь харамсалтай хэрэг.

         “Алтайн хүдэр” компани тэнд олборлолт явуулах зөвшөөрөлтэй юу гэвэл зөвшөөрөлтэй. Гэхдээ орон нутгийн удирдлага болон уугуул иргэдийн саналыг харгалзан үзэх нь юу юунаас чухал. Албан бус эх сурвалжийн мэдээллээр бол нутгийн иргэдтэй тохироо хийхэд тус сумын Засаг дарга нөлөөлөл үзүүлсэн байж болзошгүй хэмээн зарим иргэд хардаж байгаа юм. Өөрөөр хэлбэл зуулчилсан байж магадгүй хэмээн хардаж байгаа хэрэг. 

А.Гал