Дээд лигийн шилдэг шидэгчдийн нэг "BCH" Гарьд багийн домог Б.Мөнхболд гурван онооны шидэлтийг амжилттай гүйцэтгэх бүртээ 100 мянган төгрөгийг сайн үйлсийн аянд хандивлахаар болжээ. Энэ талаар "Japan Car Trade" компани цахим хуудаснаа "Манай компани нийгмийн хариуцлагын хүрээнд хайртай багийнхаа дуртай тоглогчтойгоо хамтран ажиллахаар боллоo. BCH Гарьд багийн менежер Ч.Ижилболд болон тоглогч Б.Мөнхболд-той ярилцан тохиролцож BCH Гарьд багийн хожсон тоглолт болгонд, тоглогч Б.Мөнхболдын гурван онооны амжилттай хийсэн шидэлт бүрийг 100 мянган төгрөгөөр бодож , тойрог тус бүрийн тоглолт төгсгөлд хуримтлагдсан мөнгийг сайн үйлсийн аянд зориулахаар харилцан тохиролцлоо" гэв.
Б.Мөнхболд сүүлд Улаанбаатар "TLG" багийн эсрэг гурван удаа гурван онооны шидэлтийг амжилттай гүйцэтгэжээ.
Дээд лигт анх нисдэг, тохдог гэдгээрээ алдаршсан Б.Мөнхболдын шидэлт, баяр нь яахын аргагүй түүний нэрийн хуудас билээ. Мотоцикл давж үсэрдэг байсан тэрбээр сүүлийн жилүүдэд тор шатаах шахам шидэлтүүдийг амжилттай гүйцэтгэж, Монголын хамгийн их хөгжөөн дэмжигчтэй тоглогч болсон.
