“Нарантуул” худалдааны төв сүүлийн жилүүдэд “барцад” ихтэй байна. Худалдааны байр нь галд шатсанаас  үүссэн хохирлын “шархаа”  тэндэхийн  наймаачид  бүрэн нөхөж амжаагүй шахуу байтал дахиад шинээр баригдаж байсан нэг барилга нь нурав. Тэрхүү гайтай барилгын нуралтын үеэр  хажуугаар нь явж байсан Хятад улсын  иргэн амиа алдсан харамсалтай хэрэг уржигдар гарчээ. Нурсан барилгад өнгөрсөн өвлөөс эхлэн голцуу Хятадын иргэд ажиллаж байсан байна. Нуралтын шалтгаан одоогоор тодорхой бус байгаа бөгөөд зарим эх сурвалжууд “Хүчтэй салхинаас болж нурсан” гэж байна. Энэ арай үндэслэл муутай дүгнэлт болов уу. Юутай ч МХЕГ-аас тэнд одоо ажиллаж байгаа аж. Цагдаагийн ерөнхий газрын Хэвлэл мэдээллийн төвийн ажилтнуудын хэлснээр бол Баянзүрх дүүргийн цагдаагийн нэгдүгээр хэлтсээс  мөн мөрдөн шалгах ажиллагаа хийж байгаа юм байна. Уг барилга нь баригдаад дуусах дөхөж байжээ. Энэ барилгын ойролцоо гадаа талбайд худалдаа эрхэлж байсан хүмүүсийг  ойрын хоёр, гурав  хоногт  тэндээ ажиллахгүй байхыг мэргэжлийн байгууллагуудаас анхааруулжээ. Учир нь өвлийн хүйтэнд өрсөн тоосгууд нь дахиад нурж болзошгүй гэж үзсэн бололтой.

Б.Баяр 

Эх сурвалж: Tumen.mn