“Hot spot” хамтлагийн дуучин Н.Наранбаатартай ярилцлаа. Тэрбээр саяхан олон улсын дуулаачдын наадамд оролцон, Гран при шагнал хүртсэн юм.

-Манай улсын уран бүтээлчдийн ур чадвараа сорьдог олон улсын дуулаачдын наадмаас Гран при шагнал хүртээд иржээ. Наадамд хэдэн орны дуучин хүрэлцэн ирсэн бэ?

-Буриад улсад 1993 оноос хойш зохион байгуулсаар ирсэн “Белый месяц” олон улсын эстрад дуулаачдын уралдаанд амжилттай оролцоод Гран при шагнал аваад ирлээ. Энэхүү уралдаанд манай улсаас зууны манлай дуучин, Монгол Улсын Гавьяат жүжигчин Б.Сарантуяа, Монгол Улсын гавьяат жүжигчин, поп дива Ж.Алтанцэцэг нар оролцож байсан. Мөн залуу уран бүтээлчдээс Улсын филармонийн гоцлол дуучин Т.Амина, Б.Маралжингоо нар тэргүүн байрт шалгарч байв. Энэ удаагийн тэмцээн маш өргөн дэлгэр, зохион байгуулалт сайтай болсон. Энэхүү уралдаанд 2011 онд би хамтлагаараа оролцож тэргүүн байрт шалгарч байсан юм. Харин энэ жил надаас“Ганцаараа оролцох уу” гэсэн санал тавьсан. Ерөнхийдөө энэ удаагийн уралдаанд Орос, Хятад, Солонгос зэрэг орны хүчтэй дуучид ирж өрсөлдсөн. Тэдгээрээс 2013 онд тус наадмын Гран приг авсан Солонгосын дуучин ирж оролцсон нь уралдааныг улам өрсөлдөөнтэй болгосон.

-Уралдаанд ямар дуугаар оролцсон бэ?

-Уралдаанд оролцохоос өмнө байнгын бэлтгэлтэй байсан учраас санаа зовох зүйл байгаагүй. Гэхдээ Буриадад очоод эхний шалгаруулалтын бэлтгэлийг хараад сэтгэлээр унасан. Учир нь, өрсөлдөгчид нэлээд чадварлаг дуулж байсан. Өмнө нь хамтлагаараа тэргүүн байрт шалгарсан болохоор Гран при шагнал авах миний зорилго байсан тул бусад оролцогчийг хараад өөрийгөө чамлах сэтгэл төрсөн. Үүнээс болоод эхний шалгаруулалтад дуугаа дуулахдаа сандарсан. Харин хоёр дахь шалга руулалтаас өөртэйгөө ажиллаж, зоригжуулж илүү сайн тоглолт гаргахын төлөө хичээсэн юм. Хичээл зүтгэл маань ч үр дүнгээ өгч, Гран при шагналын эзэн болсон. Би сүүлийн шалгаруулалтад “Харанга” хамтлагийн дуучин, хөгжмийн зохиолч, Монгол Улсын Урлагийн гавьяат зүтгэлтэн Ц.Чулуунбатын ая, Монгол Улсын Соёлын гавьяат зүтгэлтэн Ү.Хүрэлбаатарын шүлэг “Донжтой бүсгүй” нэртэй рокнролл дууг дуулсан. Үзэгчид ч намайг их сайхан хүлээж авсан. Дуу дуулахад үзэгчдийн алга ташилт сэтгэлийг минь их хөдөлгөсөн.

-Гран при шагнал авсны дараа хөгжмийн зохиолч, продюсер Б.Наранзунтай зураг авахуулсан байсан. Уралдаанд түүнтэй хамтарч оролцсон уу?

-Буриад улсын Соёлын газраас Б.Наранзун ахыг “Шүүгчээр ажиллана уу” гэсэн санал тавьсан юм билээ. Тэгээд л намайг шагнал авсны дараа бид зураг авахуулсан юм. Уралдааны үеэр өнгөрсөн уралдааны тэргүүн байрт шалгарсан дуучин Т.Амина, тэргүүн байрт шалгарсан дуучны хамт тоглолтын салхийг хагалсан.

-“Hотspot” хамтлагаар сонин сайхан юу байна. Танай хамтлагийг тарсан гэх мэдээлэл цацагдах болсон?

-Манай хамтлаг тараагүй. Хааяахан арга хэмжээнд уригдаж дуулчихаад л явж байгаа шүү дээ. Бид чанартай гэж нүүр бардам хэлж болох цомог гаргасан. Ерөнхийдөө хамтлагийнхны хувьд тус тусын ажлаа амжуулаад нам гүм байдалтай байгаа. Гэхдээ тун удахгүй содон сайхан уран бүтээлээр үзэгч, сонсогчидтойгоо уулзах төлөвлөгөөтэй байна.

-Хөгжмийн хорхойтнуудын дуртай урсгалуудын нэг жазз төрлийн уран бүтээлийг сонгон дуулах болсон түүхээсээ хуваалцана уу?

-Би классик дуучин болох мө-рөөдөлтэй байсан.Тэр мөрөөдлийн нэг хэсэг биелж эхэлж байгаа гэж бодож байна. Ер нь классик жазз дуу дуулахыг хичээж, тийм төрлийн уран бүтээлийг сонгон авч байгаа нь миний онцлог. Монголд ч гэсэн энэ жанрын уран бүтээлийг хийж эхэлж байна. Би энэ жил чанарын өндөр төвшинд нэг цомог гаргах төлөвлөгөөтэй байгаа. Цомогт зориулан гадаадын уран бү тээл чид хөгжим тоглоно. Мөн Мон голын авьяаслаг хөгжмийн зохиолч, уран бүтээлчид ч хамтран ажиллана.

-Та өөр мэргэжлийн хүн атал дуучин болохоор шийдсэн. Энэ шийдвэрийг гаргахад танд юу нөлөөлөв?

-Би2004 онд Хүмүүнлэгийн ухааны их сургуулийг аялал жуулчлалын мэргэжлээр төгссөн. Тэр жилдээ “Nature sound” дуу-лаачийн курст сурсан хүн л дээ. Гэхдээ тухайн үед тус кур сын анги нь дүүрчихсэн гээд дуу луулж үзэж байж намайг авах эсэхээ шийдэхээр болсон. Тэгж л би Б.Даш дондог багштайгаа анх уулзсан даа. Тэгээд Б.Маралжингоо, Б.Мөнгөнсүх, Н.Энхзол зэрэг дуучинтай шилдэг төгсөгчөөр шалгарч үлдсэн. Анхны уран бүтээл маань Б.Ангирмаа багшийн аялгуу, Хишигдэлгэр ахын үгээр бүтсэн “Чиний зүг” дуу байсан. Тухайн үед студийн ажил ихтэй байсан болохоор дуугаа идэвхжүүлэх ажилд анхаарал хандуулаагүй. Гэхдээ л тодорхой хэмжээнд олон нийтийн сонорт хүрсэн гэж боддог. Ер нь би багаасаа жил алгасалгүй урлагийн үзлэг, тоглолтод оролцдог байсан. Тэр нь л намайг дуучин болоход түлхэц болсон байх. Заримдаа дуучин болохоо мэдсэн бол СУИС-д сурдаг ч байж уу гэж боддог юм. Гэхдээ хүний амьдрал гэж их сонин. Магадгүй би СУИС-д сурсан бол өдийд зохиолын дуучин болчихсон уран бүтээлээ хийгээд явах байсан болов уу. Учир нь, тэр үед зохиолын дуучид их төрж байлаа шүү дээ.

-Таны аавыг урлагийн хүн гэж сонссон. Танилцуулж болох уу?

-Аав маань Баянхонгор айм-гийн Соёлын төвийн захирал байсан. “Од” хамтлагийн даралтат хөгжимчин, гитар тоглодог байв. Ээж маань бүжиглэдэг. Спорт талдаа ч авьяастай хүн дээ. Аав, ээж хоёрын залуудаа урлагт зүтгэж явсан нь надад нөлөөлсөн байх гэж боддог юм.

-Уран бүтээлч хүний хувьд ямар шинэлэг зүйл хийхийг хүсдэг вэ?

-СолонгосK-pop урлагаараа дэлхийд танигдсан шиг Монгол онцлогийг шингээсэн уран бүтээлчийг Ази төдийгүй дэлхийн тавцанд гаргаж мандуулахыг хүсдэг. Тэр замыг нь гаргаад өгчих юм бол Монголд Азид битгий хэл дэлхийд танигдах хэмжээний авьяас, ур чадвартай уран бүтээлч олон бий.

-Та гадаадын уран бүтээлчидтэй хамтран ажилладаг уу?

-Германы контра басс хөгжимчинтэй хамтран ажилладаг. Жазз хөгжмийн төрөлд нэлээд нэр хүндтэй хөгжимчин. Энэ багштайгаа хамтран цомог гаргана. Томоохон тоглолт ч хийхээр төлөвлөж байна.

Б.Сэлэнгэ

Эх сурвалж: Tumen.mn