Зуны улиралд хүмүүс сульдаж ядран ажлын эрч хүч буурч, ядаргаагаа хэрхэн тайлах аргаа олохгүй аминдэм уух, элдэв дусал хийлгэх зэргээр цаг, мөнгөө бардаг. Тиймээс эмийн бус аргаар өөрийгөө хэрхэн эмчлэх талаар зөвлөгөөг хүргэж байна.
ЦЭЭЖ БАГТРАХ, БӨГШҮҮЛЖ ХАНИАХААС СЭРГИЙЛНЭ
Өглөө сэрмэгц биеийнхээ булчинг сулруулан, хамраараа амьсгаа авч, хэвлийн хэсгийг агаар дүүртэл амьсгална. Хэвлийг агаараар дүүргэсний дараа амаа ангайн эвшээж байгаа юм шиг амьсгалаа гаргана. Энэ үйлдлийг өглөө бүр 10-аас доошгүй удаа хийснээр уушгины үйл ажиллагаа сайжирна. Уушги, зүрхний цусан хангамж нэмэгдэж, цээж багтрах, бөгшүүлж ханиахаас сэргийлнэ.
ҮЕ МӨЧНИЙ ДАСГАЛ
Гараа алдалж хойш, урагш тойрог хөдөлгөөн хийнэ. Гараа ташаандаа авч мөрөө хойш, урагш хөдөлгөнө. Мөн энэ байдлаас бүсэлхийгээрээ урагш, хойш, баруун, зүүн тийш хазайна. Хөл дээрээ сууж босох, хөлөө урагш, хойш, хажуу тийш авах хөдөлгөөн хийнэ. Энэ нь хуян шар усыг тарааж, үе мөчний үрэвслээс сэргийлнэ.
НҮДНИЙ ЯДАРГАА АРИЛЖ, ХАРАА САЙЖИРНА
Санаа, сэтгэлээ тайван болгосны дараа нүдээ хагас аниад нар зөв, баруун, зүүн, дээш, доош аажуухан эргүүлнэ. Дараа нь нүдээ огцом нээж дээрх хөдөлгөөнийг давтаж хийнэ. Тус бүрийг 10 удаа хийх нь тохиромжтой. Энэ дасгалыг хийснээр нүдний ядаргаа арилж, хараа сайжрахаас гадна толгой эргэх, нүд эрээлжлэх болон нүдний элдэв өвчнөөс сэргийлж чадна.
ХЭВЛИЙН БУЛЧИНГ АГШААЖ ТАТАХ
Биеэ суллаж оюун санаагаа төвлөрүүлж хамраараа амьсгал авч бага хэвлий буюу хүйснээс доошхи хэвлийн булчинг агшааж татна. Энэ байдлаа 5-20 секунд хадгалсны дараа амьсгалаа амаараа гаргаж биеэ суллана. Энэ дасгалыг өдөрт 10- аас доошгүй удаа хийснээр давсаг, бөөрний үйл ажиллагаа сайжирна.
ХЭВЛИЙД ИЛЛЭГ ХИЙХ
Гарын алгаа хооронд нь үрж бүлээцүүлсний дараа хүйсээ тойруулан нар зөв иллэг хийнэ. Дараа нь нар буруу зөөлөн дарж базна. Аль алиныг нь 10 удаа хийнэ. Энэ дасгал хоолны шингэц сайжруулах, хоол боловсруулах эрхтэний цусан хангамжийг нэмэгдүүлэн ходоод гэдэсний өвчин, өтгөн хатах, гүйлгэх, нарийн бүдүүн гэдэсний архаг өвчин, шээс тасалдах зэрэг өвчнөөс сэргийлнэ.
ЗҮРХНИЙ ТИТЭМ СУДАС ХАТУУРАХААС СЭРГИЙЛНЭ
Хүн цээжиндээ байнга иллэг хийж, зөөлөн алгадах үйлдлийг өдөрт олон хийх хэрэгтэй. Ингэснээр зүрхний үйл ажиллагааг сайжруулж цээж багтрах, зүрх, хавиргаар хатгах, зүрхний титэм судас хатуурахаас сэргийлж болно.
НУРУУГАА ЦАГ АГААРЫН БАЙДААД ТОХИРУУЛАН ДУЛААН БАЙЛГА
Нурууг цаг агаарын байдалд тохируулан дулаан байлгах хэрэгтэй. Өдөр бүр алгаа үрж бүлээцүүлсний дараа нуруугаа олон удаа илснээр нуруу хөшиж өвдөх, хэвлийн хөндийд янз бүрийн өвчин болон үе мөчний архаг хууч өвчнөөс сэргийлнэ.
УЛАНДАА ИЛЛЭГ ХИЙГЭЭРЭЙ
Хөлийн тавхайг өлмий талаас нь гурав хуваасны нэгтэй тэнцэх газарт хүний эрүүл мэндийг хамгаалах, амьдрал тэтгэх чухал цэг байдаг. Гарын алгаа үрж бүлээцүүлсний дараа дээрх цэгт өдөрт 10 удаа илж дарвал хөлийг дулаацуулж, сэтгэл өанааг тайвшруулан элэг, бөөрний үйл ажиллагааг сайжруулж, толгой эргэх, чих шуугих, нойргүйдэх, цусны даралт ихсэх, хөл өвдөхөөс сэргийлнэ.
ЦУСНЫ ДАРАМ БУУРЧ, АРЬС ЗӨӨЛӨН БАЙДАГ
Алгаа хооронд нь үрж бүлээцүүлээд толгой, мөр, гар, хөл, цээж, хэвлийн арьсыг 10 удаа зөөлөн илнэ. Ингэснээр арьсны сувүүд тэлж, ядаргаа арилж нойронд сайн болохоос гадна цусны даралт буурч, арьс уян зөөлөн болдог.
ТОГТСОН ҮРЧЛЭЭГ БАГАСГАНА
Хоёр алгаа хооронд нь халуун оргитол үрсний дараа алгаараа дух, хацар, хамрын самсааг оролцуулан нүүрээ дээш, доош нь 10 удаа аажуухан илнэ. Өдөрт хоёроос доошгүй илснээр нүүрний цусны эргэлтийн хэмжээ сайжирч арьс зөөлрөн өнгөлөг, овор багатай харагдахаас гадна үрчлээтэхээс сэргийлнэ. Ханиад томуу тусах, нүднээс нулимс гоожих, толгой, шүд өвдөх, хамар битүүрэхээс сэргийлдэг.
Эх сурвалж: "Эрүүл мэндийн жор" сонин
