44 настай Н.Б нь Чингэлтэй дүүргийн 2 дугаар хорооны нутаг дэвсгэрт байрлан үйл ажиллагаа явуулах “С-Март” гэх нэртэй дэлгүүр дотор байрлах “Хаан банкны” АТМ буюу бэлэн мөнгөний тооцооны машиныг, карт залгилаа гэх шалтгаанаар модон сандлаар хэд хэдэн удаа цохиж хууль бусаар гэмтээж “Хаан банк”-нд нийт 13.877.760 төгрөгийн хохирол учруулсан хэрэгт холбогджээ. Болсон явдлын талаар шүүгдэгч нь “... Хаан банкны АТМ-с мөнгө авах гэж байгаад картаа залгиулсан. Дэлгүүр дотор байгаа хүмүүс нь тухайн АТМ дээр ирж засдаг хүмүүсийг мэддэг болохоор нь би дэлгүүрийн худалдагч эмэгтэй дээр очоод би картаа залгиулчихлаа та АТМ-ны хүнийг дуудаад өг, би маргааш хөдөө явах болохоор карт хэрэгтэй болдог гэхэд тухайн эмэгтэй чадахгүй одоо манайх хаах гэж байна гэж уурлахаар нь би согтуудаа уурлаад дуудаад өгч чадсангүй, энийг чинь хагалах юм бол хүмүүс нь хүрээд ирэх юм биш үү гээд Хаан банкны АТМ-ны шилэн дэлгэцийг дэлгүүрт байсан модон тавцантай, түшлэгтэй сандлаар хэд хэдэн удаа цохиж хагалсан. Бэлэн мөнгөний тооцооны нүүр, хаалт зэрэг эд анги нь эвдэрсэн, хуванцар материалууд нь хагараад энэ тэндгүй үсэрсэн, шилэн дэлгэц нь хагарсан харагдаж байсан. Гэм буруугаа хүлээн зөвшөөрч байна. Боломжоороо хохирлыг барагдуулна. Бэлэн 13 саяыг гаргаж өгнө гэдэг миний амьдрал хэцүү байна” гэжээ. Шүүх түүнийг 500 мянгаар торгож дээр нь 13,8 сая төгрөг гаргуулж Хаанбанкинд өгөхөөр болжээ.