УИХ-ын ээлжит бус чуулган хаалгаа хав даран түгжиж байгаад санал нэгтэй хэлэлцэн баталсан “Өршөөлийн тухай хууль” нийгэмд талцал үүсгэж, эрх баригч намуудын хэн нь хэн бэ гэдгийг хангалттай харуулж амжсан гэхэд болно. Нууц хуралдааны проткол ил гарахгүй нь нэгэнт тодорхой. Тиймээс тухайн үед хэн ямар байр суурьтай байсан бэ гэдэг нь ч нууц хэвээр үлдэнэ. Харин өнөөдөр чуулган нээлттэй хуралдаж, уг хуульд Ерөнхийлөгчийн тавьсан хоригийг хэлэлцэх үеэр улстөрчид арьсаа хамгаалах бяцхан дайн өрнүүллээ.
Тухайлбал, УИХ-ын гишүүн С.Бямбацогт “Ардын намын гишүүд дуугүй байж, Өршөөлийн хуулийг дэмжсэн гэж байна. Биднийг хүч түрээд явсан. Тэгж яривал энэ хуультай холбогдон орж ирсэн Эдийн засгийн ил тод байдлын хуулийг хэлэлцэх үеэр авлига авч хөрөнгөжсөн албан тушаалтнуудыг хуульд хамруулан өршөөж болохгүй гэдэг саналыг МАН-ын бүлэг тавьсан шүү. Хөрөнгө орлогын мэдүүлэг гаргадаг 30 мянган албан тушаалтанд энэ хууль үйлчлэхгүй гэж МАН-ынхан санал гаргаж байж үйлчлэхгүй болгосон. Энэ санал чуулганы протоколд цагаан дээр хараар бичсэн байгаа” хэмээн хадуурч орхих нь тэр.
С.Бямбацогт гишүүний цагаан дээр хараар бичсэн гээд буй ээлжит бус чуулганы протоколыг сөхөж үзвэл зарчмын зөрүүтэй дээрх саналыг МАН-ын бүлэг бус, Бие даагчдын зөвлөл УИХ-ын гишүүн Х.Болорчулуун гаргаж, олонхийн дэмжлэг авсан байх юм. Харин ч МАН-ынхан уг саналыг өөнтөглөж, багагүй санал шүүмжлэл өрнүүлж байжээ. Ц.Нямдорж гишүүн л гэхэд “Авлигын эсрэг хуулийн заалт энд байсан ч байгаагүй ч Эрүүгийн хуулиар чөлөөлөгдөнө. Шал дэмий зүйл ярих юм” хэмээн байр сууриа илэрхийлж байсан нь “цагаан дээр хараар” үлджээ.
Энэ мэтчилэн хаалттай чуулганаар хэлсэн ярьснаасаа 180 хэм хазайж, камерын өмнө энхийн цагаан тагтаа болон жүжиг тоглосон нээлттэй хуралдаанаар гишүүд Ерөнхийлөгчийн хоригийг хүлээн авахаар боллоо.
