МАН-ын Ерөнхий ерөнхий нарийн бичгийн дарга Д.Амарбаясгалан Засгийн газрын хэрэг эрхлэх газрын даргаар томилогдсон учраас МАН-ын гал тогоог барих эрхмийн эрэлд сэм мордоцгоожээ. Энэ нь томилгооны дараа ч биш байх, төлөвлөгөөний дагуу эртнээс эрэлд мордсон биз. Тиймдээ ч дараагийн генсекийг намын удирдах түвшин, аппаратад ажиллаж байсан залуусаас сонгохоор шийдвэрлэсэн гэдгийг эх сурвалж хэллээ.

Учир нь тэд сүүлийн жилүүдэд МАН-ын дотоод ажилд гар бие оролцож, ялалт ялагдлын алинд ч нэгэн сэтгэлээр зүтгэсэн учраас намын жаргал зовлонг мэдэх хүн хэрэгтэй гэж үзсэн бололтой. Тэдгээрт МАН-ын Хэвлэл мэдээлэл, цахим бодлогын газрын дарга Ц.Чулуунзагд, Намын байгуулалтын газрын дарга Н.Энхбаатар нарыг удирдах түвшинд нэрийг нь дурдаад эхэлжээ.

Намын удирдах түвшинд тоогдоод буй Ц.Чулуунзагдын хувьд МАН-ын бүх шатны сонгуульд генсек Д.Амарбаясгалантай гар сэтгэл нийлж ажилласан, хэвлэл мэдээллийнхэнтэй ойр, пиараар мэргэшсэн, намын ажилчид болон гишүүдтэй аль ч түвшинд ойлголцож чаддагаараа онцлог гэдгийг дурдсан. Тиймээс түүнийг Ерөнхий нарийн бичгийн дарга болбол шат шатны сонгуульд намаа удирдан орох туршлагаас гадна бүхий л түвшинд ойлголцож чадна хэмээн үзэж байгаа аж.

Мөн ихэс ахасаасаа үнэлгээ аваад байгаа Н.Энхбаатарын хувьд ч намыг удирдлагаар хангах тал дээр анхаарч ажилласан гэж үзэж байгаа юм байна. Тэрбээр урьд өмнө Төрийн өмчит МИАТ-ын дэд захирлаар ажиллаж байсан бөгөөд Хэнтий аймагт болсон УИХ-ын нөхөн сонгуульд нэрээ дэвшүүлэхээр зэхэж байсан ч эцэст нь нэрээ татсан гэдгийг санаж байгаа байх.

Ямартай ч МАН олон сонгуулийн утаа үнэртэж, дотоод ажилд нухлуулж байсан залуусаасаа генсек болгохоор ярьж байгаа аж.

Түмэн.мн