Нийслэлийн хэмжээнд хот төлөвлөлт, газар зохион байгуулалтын ажил ямархуу түвшинд явагдаж байгааг уржигдар орой болсон Баянгол дүүргийн нутаг дэвсгэрт орших гуравдугаар хорооллын “Ачлал” их дэлгүүрийн чанх ард байрлах 12 давхар XVI байр гэрчилж байна.
Хамгийн гол нь энэхүү байрыг нурах аюулд оруулсан “Би Жи Би Жи” ХХК-нь Нийслэлийн Ерөнхий төлөвлөгөөний газрынхантай /НЕТГ/ үгсэн хуйвалдаж газрын зориулалтыг нь өөрчилж барилгын ажлыг эхлүүлсэн нь олон бичиг баримтаар тогтоогдож эхэллээ.
Тухайлбал, НЕТГ-ын орлогч дарга Ш.Уртнасан өнгөрсөн оны есдүгээр сарын 17-ны өдөр Баянгол дүүргийн Засаг даргын орлогч Г.Энхболдод 7/2776 дугаартай албан бичгийг илгээж байсан байна.
Уг албан бичигт дурьдаснаар “Баянгол дүүргийн 15 дугаар хорооны нутаг дэвсгэр орон сууцны 22 дугаар байрны ба руун талд үйлчилгээтэй орон сууцны зориулалтаар “Би Жи Би Жи” ХХК-ийн эзэмшиж буй газарт манай байгууллагаас “Барилгын ажлыг эхлүүлэх, үргэлжлүүлэх зөвшөөрөл” олгоогүй ба танай албан бичигт дурьдагдсан 2014 оны 07 дугаар сарын 22-ны өдрийн 29/2014 дугаартай зөвшөөрөл нь Сүхбаатар дүүргийн 11 дүгээр хороонд баригдах “Эн Эн Жи Юу” ХХК-ийн барилгын зөвшөөрөл байна” гэсэн байна.
Түрүүч нь 1-р нүүрт
Э.Бат-ҮҮл тус компанид 3000 м2 газрыг гараж ҮйлЧилгээний зориулалтаар олгож байсан
Бас нэгэн баримт гэвэл дээрх компани анх 2011 онд тус газарт орон сууцны барилга барих зөвшөөрөл авч хугацааг нь дуусангуут 2014 онд хотын дарга Э.Бат-Үүлээр сунгуулж байсан байна. Тодруулбал нийслэлийн Засаг даргын 2014 оны хоёрдугаар сарын 24-ны өдрийн А/115 дугаар захирамжаар газар өмчлөх эрхийн 000305146 тоот гэрчилгээг сунгаж 2014 оны долоодугаар сарын 22-ны өдөр 29/2014 дугаартай барилгын ажлыг эхлүүлэх, үргэлжлүүлэх зөвшөөрлийг 2014 оны долоодугаар сарын 22-ны өдрийн 2015 оны долоодугаар сарын 22-ны өдрийг хүртэл нэг жилийн хугацаатайгаар БХБЯ-ны Барилга, барилгын материалын бодлогын хэрэгжилтийг зохицуулах газрын дарга Б.Цэдэндамба гэх хүн гарын үсэг зуран баталгаажуулсан байдаг байна.
Тэгвэл БХБЯ-ны төрийн нарийн бичгийн дарга Р.Эрдэнэбүрэн өнгөрсөн гуравдугаар сарын 10-ны өдөр 3/706 дугаартай албан бичгийг МХЕГ-т илгээж байсан байна. Эл бичигт “Нийслэлийн Баянгол дүүргийн 15 дугаар хорооны нутаг дэвсгэрт “Би Жи Би Жи” ХХК-ийн захиалгаар баригдах үйлчилгээтэй орон сууцны барилгад манай яамнаас 2014 онд барилгын ажлыг эхлүүлэх 29/2014 тоот зөвшөөрлийг олгожээ” гэсэн байгаа юм. Эндээс харахад төрийн байгууллагууд хоорондоо ямар ч уялдаа холбоогүй ажиллаж хаана, хэнд ямар зөвшөөрөл өгсөн ч тодорхой биш гэдэг нь дээрх албан бичгүүдээс харагдаж буй юм.
ЗӨвшӨӨрӨл олгосон этгээдҮҮдийг шалгуулна
Түүнчлэн өнгөрсөн оны аравдугаар сард 16 дугаар байрны оршин суугчид НМХГ-т гомдол гаргасны дагуу Улсын байцаагч нар газар дээр нь очиж хяналт шалгалт хийхдээ одоо болж буй үйл явдлыг засаж залруулахыг шаардаж байжээ. Өөрөөр хэлбэл, тус газраас “16 дугаар байрны зүүн талын далангийн дагуу хамгаалалт хийлгүй газар шорооны ажил хийснээс нягтруулсан шороо их хэмжээгээр нурж хөндий үүссэн, зам, талбайн хавтан хөдөлгөөнд орж нурах аюултай болсныг шалгалтаар тогтоосон байна”.
Түүнчлэн Нийслэлийн Мэргэжлийн хяналтын газраас 2014 оны есдүгээр сарын 22-ны өдөр Нийслэлийн Ерөнхий төлөвлөгөөний газарт /НЕТГ/ зөрчил арилгуулах тухай улсын байцаагчийн албан шаардлага ч хүргүүлсэн байна.
Ямартай ч дээр дурьдсанчлан хотын даргын А/115 тоот газар өмчлөх эрхийн захирамжаар тус компанид 3000 м2 газрыг гараж үйлчилгээний зориулалтаар олгож байжээ. Гэтэл НЕТГ өнгөрсөн сарын 19-ны өдөр БГД/337 дугаартай архитектур төлөвлөлтийн даалгавар үйлчилгээ бүхий 18 давхар орон сууцны барилга болгож газрын зориулалтыг нь өөрчлөн баталжээ.
Өөрөөр хэлбэл, НЕТГ-ын орлогч дарга өнгөрсөн оны есдүгээр сарын 17-ны өдөр БГД-ийн Засаг даргын орлогч Г.Энхболд руу 7/2776 дугаартай албан тоот илгээхдээ “манай байгууллагаас барилга эхлүүлэх, үргэлжлүүлэх зөвшөөрөл олгоогүй” гэж мэдэгдсэн хэрнээ яагаад энэхүү газрын зориулалтыг өөрчилж батлав аа гэдэг нь хачирхалтай. Угтаа бол тус газрынхан “Хот байгуулалтын тухай хуулийн 24 дүгээр зүйлийн 24.1.3 дахь /олгосон газарт зориулалтын бус барилга, байгууламж барих, хүн амын амьдрах орчны чанарт сөрөг нөлөө бүхий үйл ажиллагаа явуулах/ гэсэн заалтыг тус тус зөрчсөн гэсэн үг.
Харин тэднийг энэхүү бусармаг ажиллагаагаа зогсоо гэдэг албан шаардлагыг НМХГ-ын улсын байцаагч өнгөрсөн оны есдүгээр сард, өнгөрсөн гуравдугаар сарын 23-ны өдөр НЕТГ-т тус тус хүргүүлсэн ч тусыг эс олж өнөөдрийн нөхцөл байдал үүсээд байна гэсэн үг. Уг нь мэргэжлийн хяналтынхан болзошгүй аюулаас урьдчилан сэргийлж тодорхой арга хэмжээнүүдийг авсан боловч том толгойтой төрийн байгууллагуудын өмнө ийнхүү хүчин мөхөстсөн байна. Товчхондоо бол мэргэжлийн хяналтынхан НЕТГ-ыг архитектур төлөвлөлтийн даалгавраа цуцалж, газрыг зориулалтын дагуу төлөвлөлт хийхийг шаардсан гэсэн үг юм.
Энэ асуудлаар Баянгол дүүргийн Засаг дарга Г.Оросоо “Зөвшөөрөл олгосон болон, барилгын суурь ухаж, зэргэлдээх байрны олон арван оршин суугчдыг түгшүүрт байдалд оруулсан буруутай этгээдүүдийг шалгуулж, эрүү үүсгэх болно” гэдгээ мэдэгдсэн.
Ямартай ч өнөөдөр маш олон хүн төрийн байгууллагын авлига хээл хахуулийн сүлжээнд орсон “Би Жи Би Жи” ХХК-ийн хууль бус үйлдлээс болж орох оронгүй айл хэсүүчлэх, зарим нэг нь зочид буудалд хоног өнгөрөөх нь тодорхой боллоо.
Хэрвээ тус компанид БХБЯ-наас 18 давхар барилга эхлүүлэх зөвшөөрөл өгөөгүй байсан бол НЕТГ-ынхан газрын зориулалтыг нь өөрчлөөгүй бол өнөөдрийн энэ аймшигтай аюул нүүрлэхгүй байх байсан болов уу.
Хаа сайгүй хариуцлагын тогтолцоо алга болсныг энэ үйл явдал тодоор гэрчиллээ.
Эцэст нь хэлэхэд төрийн байгууллагын их хэмжээний авлигын сүлжээг “Би Жи Би Жи” ХХК илчлэх шиг боллоо.
Эх сурвалж:
