БОАЖ-ын сайд Б.Бат-Эрдэнэ Аялал жуулчлалын хөгжлийн төв, Цэнгэг ус, байгаль хамгаалах төв, Цаг уур, орчны шинжилгээний газар зэрэг тус яамны харьяа газрын үйл ажиллагаатай танилцаж, ажилтан, албан хаагчдын төлөөлөлтэй уулзлаа.

Уулзалтын эхэнд БОАЖЯ-ны харьяа газрууд мэдээллээ танилцуулаад цаашид хийхээр төлөвлөсөн ажил, тус газрын ажилчдын цалин, нийгмийн асуудлыг бодлогоор дэмжихийг хүсэв.

Тухайлбал, хүний нөөцийг төрийн албаны цалингийн шаталсан системтэй уялдуулан шинэчлэх, нэн ялангуяа эдгээр газарт тусгайлсан мэргэжилтэнг улсдаа цөөн бэлтгэдэг. Насны хувьд харьцангуй залуу, цаг үеэ дагаад чадварлаг боловсон хүчин бэлтгэж байгаа ч цалин бага учир ажиллах мэргэжилтэн олдохгүй байгааг хэллээ.

Түүнчлэн цар тахлын улмаас өнгөрсөн 3 жилд бүтээн байгуулалтын хөрөнгө оруулалт, техник шинэчлэл, мэргэжилтэн чадавхжуулах зэрэг нь орхигдсон. Иймд салбарын зорилгоо өргөжүүлж, тогтвортой бодлогоор хамтын ажиллагаагаа уялдуулан дэлхийн хөгжил рүү хурдацтай тэмүүлэх хэрэгтэйг хөндөж байв.

Уулзалтын үеэр Аялал жуулчлалын хөгжлийн төв, Цэнгэг ус, байгаль хамгаалах төв, Цаг уур, орчны шинжилгээний газрын удирдлагууд цар тахлын цаг үед бүхий л үйлчилгээ, мэдээлэл, хурал, зөвлөгөөнийг цахим руу шилжүүлж чадсан давуу талтай ч техник тоног төхөөрөмжийн шинэчлэл хийх шаардлагатайг танилцуулаад, салбарын сайдаас нэг бодлогоор тогтвортой цаг хугацаанд салбараа удирдаж, дэмжин ажиллахыг хүсжээ.