Оросын мотоцикльчдын “Шөнийн чоно” клубынхан Их ялалтын 70 жилийн ойд зориулан ЗХУ-ын Улаан армийнхны явсан замаар аялж байна. Тодруулбал, мотоцикльчид нутаг нэгт дайчдын ялалт байгуулсан нутаг Европоор аялах төлөвлөгөө боловсруулжээ.

Багийнхан өчигдөр Мюнхен хотод ороход Германы цагдаа нар хоёр цаг орчим хугацаанд саатуулан баримт бичгийг шалгасны эцэст паспортуудыг нь эргүүлэн өгчээ. Гэвч ОХУ-тай таагүй харилцаатай байгаа Германы аюулгүй байдлыг сахиулагчид аялагчдыг даган мөрдсөөр байгаа аж.

“Шөнийн чоно”-нууд Москвагаас гарч Минск, Брест, Вроцлав, Брно, Братислав, Вена, Мюнхен, Прага, Торгау гэсэн хотуудаар дамжин  Берлин хүрэхээр төлөвлөжээ. Тэд Польшийн нутгаар дамжих байсан ч Польш тэднийг хилээрээ нэвтрүүлээгүй байна.

“Шөнийн чоно" клуб нь 1989 оны 5 сарын 31-нд байгуулагдсан бөгөөд Оросын мотоцикльчдын хамгийн анхны клуб аж. 1992 оноос хойш клуб олон улсад бүртгэгдэж, өдгөө 5000 гаруй гишүүнтэй болтлоо өргөжээ.

Энэхүү клубын үйл ажиллагааг ОХУ-ын Ерөнхийлөгч Владимир Путин ихэд дэмждэг. Тэрээр 2009 онд клубын Москва хот дахь төв байрт зочилсноос хойш олон удаа тэдэнтэй нэгдэн арга хэмжээнд оролцож байсан аж. Өнгөрсөн жил л гэхэд Владимир Путин клубын тэргүүн Залдостановыг төрийн одон медалиар шагнаж байсан юм.

Тиймээс энэхүү аялалыг хийх саналыг В.Путин гаргасан байж мэдэх хэмээн хардах бүлэг байна.

Г.Үжин

www.24tsag.mn