Роберт Фишер, Магнус Карлсен, Гарри Каспаров зэрэг дэлхийд нэрээ цуурайтуулсан аварга шатарчдаас нэг нь ч Е.Төгстөмөр шиг долоон насандаа дэлхийн аварга гэсэн алдрыг хүртээгүй билээ. Шатрын өнө эртний уламжлалтай монголчуудын дундаас төрөн гарсан шатарчин хүүтэй ярилцлаа. Есөнтөмөрийн Төгстөмөрийг арван насандаа олон улсын мастер, 12 насандаа их мастер болж дэлхийд амжилт тогтоох боломжтойг Олон улсын шатрын холбооны зөвлөх багш нь хэлсэн байдаг. Е.Төгстөмөр хэдхэн хоногийн өмнө дэлхийн шатрын холбооны чансааг тэргүүлсэн билээ.Түүнтэй ярилцлаа.

-Хэдэн настайгаасаа шатар тоглож сурсан бэ?

-Би нэг нас долоон сартайдаа шатрын дүрсүүдийг нэрлэж, өрж сурсан. Н.Түвшинтөгс өвөө маань надад шатар хэрхэн тоглохыг зааж өгсөн юм. Би бас хоёр настайдаа дэлхийн бүх улсыг цээжээр нэрлэдэг байсан.

-Танайх гэр бүлээрээ шатарчид. Тэгэхээр хоёр дүү нь бас шатар тоглодог уу?

-Ээж Т.Батцэцэг маань олон улсын мастер, нагац эгч Т.Батчимэг маань их мастер цолтой. Т.Баярцэцэг эгч маань ч гэсэн шатар тоглодог. Өвөө бас цолтой. Эмээгээс бусад нь шатар сайн тоглодог. Би хоёр охин дүүтэй. Бага дүү маань хоёр настайдаа шатар тоглож сурсан.

-Ээжтэйгээ шатар тоглодог уу. Т.Батчимэг эгч нь хэрхэн, яаж тоглохыг зааж өгч байна уу?

-Багадаа ээжтэйгээ тоглохоор хожигдчихдог байсан. Одоо бол хождог. Т.Батчимэг эгч надад шатрын нүүдэл зааж өгдөг. Гэхдээ би Т.Батчимэг эгчийг хожиж байгаагүй.

-Жаахан хүүхэд юм чинь дандаа шатар тоглохоор залхдаг уу. Шатраас өөр тоглоом тоглодог уу?

-Би ямар ч хугацаагаар шатар тоглосон залхаж байгаагүй. Компьютер тоглоом тоглох дуртай.

-Миний дүүд бэлтгэлийн хажуугаар хөгжим сонсох, зурагт үзэх зав гардаг уу?

-Гардаг. Би спортын нэвтрүүлгийг л үздэг. Ялангуяа хөлбөмбөгийн тэмцээн үзэх дуртай. Хөлбөмбөгийн сүлд дуунуудыг ч сонсох дуртай. Ялангуяа Шакирагийн дууг үргэлж сонсдог. Намайг хоёр настай байхад өвөө хөлбөмбөг өшиглөхийг зааж өгсөн. Тийм болохоор хөлбөмбөгт шатар шиг дуртай.

-Дэмждэг хөлбөмбөгчин бий юү?

-Би хөлбөмбөгийн багуудаас “Барса”-г түүний дотор Неймар, Месси хоёрыг дэмждэг юм.

-Гэхдээ Неймар Бразиль, Месси Аргентиний шигшээ багт тоглодог шүү дээ. Өнгөрсөн зун болсон Дэлхийн аваргын тэмцээнд аль багийг нь дэмжив?

-Бразилийн багийг дэмжсэн. Харамсалтай нь Германд 7:1-ээр хожигдсон. Тэр тоглолтыг аав, ээжтэйгээ зурагтаар үзсэн юм. Аав бид хоёр Бразилийг, ээж Германы багийг дэмжиж байсан. Неймар бэртэл авч, Бразилийн баг хожигдоход сэтгэл сонин болсон шүү.

-Нэг өргийг удаан тоглох хэцүү байдаг уу?

-Гайгүй ээ. Харин өрсөлдөгч удаад байхаар уйтгартай санагддаг.

-Өрсөлдөгч гэснээс аль улсын шатарчинтай тоглоход хэцүү байдаг вэ?

-Оросын шатарчид нүүдэл сайтай учраас тоглоход эвгүй байдаг.

-Уралдаан, тэмцээнээс медаль авахад ямар байдаг вэ. Медалиа тоолж үзсэн үү?

-Гоё санагддаг. Тивийн болон дэлхийн аварга шалгаруулах тэмцээнээс дөрвөн алт, хоёр мөнгө, гурван хүрэл, улсын аваргын тэмцээнээс хоёр алт, нэг мөнгөн медаль нийт 12 медальтай.

-Олон улсын чанартай ямар тэмцээнд анх оролцож байв?

-Шри-Ланка улсад болсон Ази тивийн аварга шалгаруулах тэмцээнээс стандарт, хагас түргэн, түргэн тоглолтын төрөлд нэг ч хожигдол, тэнцээгүй түрүүлж гурван алтан медаль хүртэж байсан.

-Долоон насандаа дэлхийн аварга болсон тэмцээнийхээ талаар яриач?

-Грекийн Порто Карраст 2013 онд зохиосон сурагчдын Дэлхийн аваргын тэмцээнд нэг ч нэг ч хожигдол, тэнцээгүй түрүүлж аваргын цом, алтан медаль бас Олон улсын шатрын холбооны дэд мастерын зэрэг авсан.

-Хамгийн сүүлд ямар амжилт гаргав?

-ӨАБНУ-ын Дурбан хотод болсон өсвөрийн шатарчдын Дэлхийн аварга шалгаруулах тэмцээний найм хүртлэх насны ангилалд мөнгөн медаль хүртсэн. Энэ тэмцээнд 92 орны мянга гаруй шатарчин оролцсон.

-Тэмцээн, уралдаанд оролцоод их олон орноор аялжээ. Хамгийн гоё нь ямар улс байв?

-Тийм ч олон орноор аялаагүй. Шри-Ланка, Грек, Иран, Узбекстан, Орос, Эмират, Хятад зэрэг оронд очиж үзсэн. Хамгийн гоё нь Австри улс байсан. Манай эмээгийн дүү нь Австрид байдаг. Би ээжтэйгээ хамт очсон юм.

-Гадаадад очоод ямар нэгэн зүйл худалдаж авдаг уу?

-Би өөртөө тоглоом худалдаж авдаг. Улаан-Үдэд багштайгаа бэлтгэл хийж байгаад ирсэн. Тэгэхдээ бөмбөг худалдаж авсан.

-Орос багштай хичээллэдэг хэрэг үү. Тэгэхээр орос хэл сурч байгаа байх нь ээ?

-Тийм ээ. Антон гэдэг багштай хичээллэдэг. Би орос, англи хэл үзэж байгаа. Орос хэл хүмүүсийн хэлдэг шиг хэцүү биш юм шиг санагдсан.

-Гадаад руу тэмцээн, бэлтгэлээр явахдаа найз нараа санадаг уу?

-Ээж маань Бээжинд Элчин сайдын яаманд ажилладаг. Би элчин сайдын яамны ажилтнуудын хүүхдүүдтэй найзалдаг. Найзуудаа л санаж байна.

-Гарри Каспаров, Бобби Фишер гээд алдартай шатарчин олон байдаг. Нэр алдраа дуурсгасан шатарчдаас хэнийг хүндэлдэг вэ?

-Би Магнус Карлсен шиг шатарчин болохыг хүсдэг. Магнус Карлсен чансаагаараа одоо дэлхийд тэргүүлж байгаа. Бас Магнус Карлсен хөлбөмбөгчин.

-Чиний мөрөөдөл юу вэ?

-Дэлхийн аварга хөлбөмбөгчин бас шатарчин болох.

-Дэлхийн шатрын холбооны Ерөнхийлөгч Кирсан Илюмжиновтой зургаа авахуулжээ. Энэ хүнтэй уулзаж, ярилцсан байх нь ээ?

-Эмиратын Аль Аин хотод 2013 онд Кирсан Илюмжиновтой таарсан. Олон зүйл ярилцаагүй. Зүгээр л зургаа хамт авахуулсан юм.