УИХ-ын гишүүн А.Адъяасүрэн нүүрс тээврийн C зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам.долларын авлига өгсөн хэргээр удаан хугацаанд шалгагдаж яллагдагчаар татагдсан. Багагүй хугацаанд ийм аргаар Гашуунсухайтын авто замд ноёрхлоо тогтоосон тэрбээр Улсын Их Хурлын гишүүний халдашгүй эрхээр “халхлагдсан”-аас хойш ч түүний эзэмшлийн компаниудын жолооч нараас Монгол Улсын дархан хилээр хориотой бараа бүтээгдэхүүн болох үнэт чулуу, малын түүхий эд, эрэвгэр жиргэрүү зэргийг давуулах гэж оролдсон ноцтой хэргүүд удаа дараа илэрч газар дээр нь баримтжуулан хэвлэлд мэдээлж байсан ч хариуцлага хүлээж байсан удаагүй билээ.
Харин түүнийг яллагдагчаар татагдах тогтоолтойгоо танилцаж гарын үсэг зурсны дараа одоо л хариуцлага хүлээх болов уу гэсэн хүлээлттэй байсан боловч Нийслэлийн прокурорын газрын Ерөнхий прокурор Ш.Нямдоржийн тамга гарын үсэгтэй хүсэлт АТГ-т ирсэн нь урам хугалав.
АТГ удаан хугацаанд хөдөлшгүй баримтаар тогтоосон хэргийг яаж “солиорохоороо” Нийслэлийн Ерөнхий прокурор хаацайлж 2021 оны хоёрдугаар сарын 9-ний өдрийн хариу мэдэгдэлдээ “Танаас гаргасан гомдлын дагуу эрүүгийн хэрэг үүсгэж яллагдагчаар татсан тогтоолыг хүчингүй болгож шийдвэрлэлээ” гэж “рапортолдог” байна аа?
Түүний хэргийг шалгаж байсан АТГ-ын мөрдөн байцаагч үүний төлөө баримт материалыг шинжилж ажилласан болж таарч байна уу?
Нийслэлийн Ерөнхий прокурор Ш.Нямдоржийн энэхүү хариу мэдэгдэл гэгчид аль хуулийн ямар “үндэслэл, журмын дагуу хүчингүйд тооцож” шийдвэрлэсэн нь тодорхой заагаагүй байна. Гэхдээ энэ хариу мэдэгдлийн үндэслэсэн тогтоол нь алга. Авлига өгсөн гэдэг нь нотлогдоод эрүүгийн хэрэгт яллагдагчаар татсан байхад авлига өгөөгүй гэх үйл баримтгүйгээр гишүүний “гомдол барагдуулах” нь Нийслэлийн Ерөнхий прокурорын хувьд маш зохисгүй үйлдэл юм. Цагаатгах талын баримт хавсаргаагүй, дурдаагүйгээс үзэхэд энэ бол тал зассан үйлдэл.
Мөрдөгч, прокурор, шүүгч ЭХХШХ-ийн зарчим, журмыг зөрчвөл үйл ажиллагаа нь хууль ёсны юу, нотлох баримт нь хүчинтэй эсэх гэдгээс эхлээд хөдөлшгүй нотолгоо бүхий эх сурвалж заавал дурдагдсан байх ёстой. Үүний дараа хууль бус нотлох баримт цуглуулсан үндэслэл болгосон эрүүгийн хэрэг үйлдсэн яллах тогтоолыг хүчингүй болгох учиртай.
УИХ-ын гишүүн А.Адъяасүрэн холбогдох хэргийн тухайд хэвлэлд олонтаа гарч байсан, Нийслэлийн прокурорын Ерөнхий прокурорын албан бичигт дурдсанаар дахин танилцана уу. Ямартай ч АТГ-ын удаан хугацаанд нягтлан шалгаж тогтоосон хэргийг Нийслэлийн прокурорын газрын Ерөнхий прокурорын энэхүү хариу мэдэгдэл бичиг хэрхэн үгүйсгэж буйг харахад туйлын харамсалтай байлаа. Уг хэргийг хэрхэн шийдвэрлэсэн талаар бид эргэн сурвалжлах болно.
newspress.mn
