Албан тушаалын цол гэж айхтар зүйл гарч ирж нэг хэсэгтээ янз бүрээр хэлэгдсэн. Энэ бол Х.Тэмүүжингийн сайд байхдаа хэрэгжүүлсэн ажил.  

Тодруулбал, нутаг дэвсгэр хариуцсан газар, хэлтсийн дарга болвол цагдаагийн хурандаа цол зүүнэ. Харин нэгжийн дарга бол  ажилласан жилээсээ хамаарч хошууч, ахмад цолтой, ахлах дэслэгч, дэслэгч гээд цол бүр өөрийн гэсэн месттэй болж хувирсан.

 Энэ нь  олон жил үр бүтээлтэй ажилласан хугацаагаасаа хамаарч цол авахгүйгээр тухайн үед ямар албан тушаалд томилогдоно тэрнийхээ хүрээнд цол авч эхэлсэн гэсэн үг.  Нөгөөтэйгүүр  гэмт хэрэг илрүүлэх, мөрдөн шалгахад онцгой гавъяа байгуулсан, бусдыг аврах хамгаалах баатарлаг үйлс бүтээсэн ч гэсэн хурандаа цол олгохгүй. Зөвхөн газар, хэлтсийн дарга болвол хурандаа хэмээх хүндтэй цолыг зүүх заяа тохиосон. Мэдээж энэ бүхэн зарим алба хаагчдад сайхан ч, үлдсэн хүмүүст хэтэрхий шударга бус зүйл болж орхих нь ойлгомжтой.

Тэгвэл Х.Тэмүүжингийн хууль зүйн салбарын шинэчлэлийг эхнээс нь баллуурдаж эхэлсэн Д.Дорлигжав сайд албан тушаалын цолыг болиуллаа.

Тушаал гарсан учир албан тушаалын цолны асуудал өнөөдөр цэгцэрнэ гэж цагдаагийн байгууллагын эх сурвалж онцоллоо. Тэгэхээр өнөөдөр  албан тушаалд томилогдож цол авсан хүмүүс хуучин цолоороо үлдэж, харин ажлын байр, албан тушаалаасаа болоод цолоо бууруулсан хүмүүс эргэн цолоо сэргээж эхлэх юм.

Энэ бүхнээс үүдэж эрх баригчид доод албан тушаалтнууд хийгээд алба хаагчдаар хэрхэн тоглож байгааг харж болох юм. Нэг нь баталж, нөгөө нь болиулах явцад зарим албан тушаалтнууд нэр хүндээрээ хохирч үлдэж байгааг ч нуух юун.

 Энэ мэтчилэн бүтцийн болоод цол дагасан өөрчлөлтийг зарим хуулиар гаргаж ирсэн ч өнөөдрөөс эргэн хэвэндээ орох нь тодорхой боллоо.

Д.Ундрах

Эх сурвалж: 24tsag.mn/