Засгийн газар, Хүн амын хөгжил, нийгмийн хамгааллын яамнаас 2015 оныг “Залуучуудын хөгжлийг дэмжих жил” болгон зарласан. Иймээс  Засгийн газар, Азийн залуучуудын зөвлөл, Монголын залуучуудын холбоо хамтран Азийн залуучуудын зөвлөлийн ээлжит 13 дугаар ерөнхий чуулганыг “Нэг Ази 2015: Тогтвортой хөгжлийн зорилтод залуучуудын оролцоо” сэдвийн дор зохион байгуулах гэж байгаа ажээ.  Үүнтэй  холбогдуулан Хүн амын хөгжил, нийгмийн хамгааллын сайд С.Эрдэнэ мэдээлэл хийлээ.  Тэрбээр “Монгол Улсын хүн амын 30 гаруй хувийг залуучууд эзэлж байгаа. Залуучуудын хөгжлийг дэмжих жилийн хүрээнд  Засгийн газар, Хүн амын хөгжил, нийгмийн хамгааллын яамнаас хэд хэдэн томоохон ажил төлөвлөсний нэг нь энэ чуулган юм. Азийн 23 улсын бодлого боловсруулагч, судлаач эрдэмтэд,  шийдвэр гаргах түвшний 600 зочид, төлөөлөгчид чуулганд  оролцоно.  Чуулган 05 дугаар сарын 18-21-ний өдрүүдэд болно” гэв. Мөн  энэхүү чуулганыг Улаанбаатар хотноо зохион байгуулж буй нь бүс нутаг төдийгүй дэлхий нийтийн хэмжээнд ач холбогдолтой хэмээн тооцож  НҮБ-ын  Хүн амын сангаас онцгой анхаарч, ач холбогдол өгч ажиллаж байгаа гэсэн юм.

Б.Баяр 

Эх сурвалж: Tumen.mn