Монгол Улсын Хүнс, хөдөө аж ахуй, хөнгөн үйлдвэрийн дэд сайд Ж.Сауле АНУ-ын Вашингтон хотноо 2020 оны 2 дугаар сарын 10-14-ний өдрүүдэд ажлын айлчлал хийж байна.
Айлчлалын хүрээнд АНУ-ын Хөдөө аж ахуйн яамны төлөөлөл хоёр орны хооронд харилцан ашигтай хамтын ажиллагааг өргөжүүлэх эрмэлзэлээ нотолж, салбарын бодлого, хэрэгжүүлж буй арга хэмжээг танилцуулж, нээлттэй санал солилцов.
Монгол Улс, АНУ-ын худалдаа, эдийн засгийн харилцааг харилцан ашигтай байдлын үндсэн дээр өргөжүүлж, хөрөнгө оруулалтын боломжуудыг нэмэгдүүлж, хамтын ажиллагааны шинэ салбар, чиглэлүүдийг нэвтрүүлэх, техник туслалцаа авах, хүний нөөцийг чадавхжуулах, “Гуравдагч хөршийн худалдааг дэмжих тухай” хуульд Монгол Улсын зүгээс чухал ач холбогдол өгч байгааг Дэд сайд Ж.Сауле онцлон тэмдэглээд, хүнс, хөдөө аж ахуй, газар тариалангийн салбарт хамтран төсөл хөтөлбөр хэрэгжүүлэн хөгжүүлэхийг уриаллаа.
Цаашид Монгол Улс нь стратегийн түнш гуравдагч хөрш АНУ-тай хүнс, хөдөө аж ахуй, хөнгөн үйлдвэрийн салбарын хамтын ажиллагааг улам бүр эрчимжүүлж, хамтран ажиллахаа Дэд сайд Ж.Сауле илэрхийлэв.
